Туркия мундиални ғалаба билан тарк этди

 

АҚШнинг Калифорния штатидаги Инглевуд шаҳрида бўлиб ўтган баҳсда ҳисобни мезбонлар 3-дақиқада Остон Трасти голи билан очди. Орадан кўп ўтмай Арда Гулер 10-дақиқада мувозанатни тиклаган, 31-дақиқада эса Бариш Йилмаз Туркияга устунлик олиб келган.

 

Иккинчи бўлим бошида АҚШ ҳисобни тенглаштирди. Учрашувнинг қўшиб берилган дақиқаларида Каан Айҳан киритган гол Туркияга 3:2 ҳисобидаги ғалабани тақдим этган.

 

Мазкур учрашув турнир жадвали нуқтайи назаридан ҳар икки жамоа учун ҳал қилувчи аҳамиятга эга эмас эди. АҚШ терма жамоаси аввалги турларда Парагвай ва Австралия устидан қозонилган ғалабалар эвазига муддатидан олдин плей-офф масаласини ҳал қилган эди.

 

Туркия эса гуруҳ босқичидаги дастлабки икки учрашувда Австралия (0:2) ва Парагвайга (0:1) мағлуб бўлгани сабабли плей-оффга чиқиш имкониятидан айрилганди.

 

Гуруҳнинг параллель учрашувида Австралия ва Парагвай дуранг ўйнади. Ҳар икки жамоа тўрт очкодан жамғарган бўлсада, тўплар нисбатига кўра Австралия иккинчи ўринни эгаллаб, плей-офф йўлланмасини қўлга киритган. Парагвай эса энг яхши учинчи ўрин эгаларидан бири сифатида кейинги босқичга чиқиш имкониятини сақлаб қолган.

 

Маълумот учун, 2026 йилги Жаҳон чемпионати тарихда илк бор 48 та терма жамоа иштирокида АҚШ, Канада ва Мексика мезбонлигида ўтказилмоқда. Турнирнинг 1/16 финал босқичи 28 июндан бошланади, финал учрашуви эса 19 июль куни бўлиб ўтади.