Қирғизистонда Ислом Каримовга ҳайкал қўйган бўлардим — Асқар Акаев
Қирғизистоннинг биринчи президенти Асқар Акаев Ислом Каримов давридаги Ўзбекистоннинг нисбатан ёпиқ сиёсати Қирғизистон ва Қозоғистон тадбиркорлари учун имконият яратганини айтди.
Қирғизистоннинг биринчи президенти Асқар Акаев Ўзбекистоннинг марҳум президенти Ислом Каримов давридаги ёпиқ сиёсат Қирғизистон ва Қозоғистон тадбиркорлари учун имконият яратганини айтди. Бу ҳақда у яқинда эълон қилинган подкастда сўз юритди, дея ёзмоқда BBC.
Акаевнинг фикрича, агар Ўзбекистон ўша даврда ҳозирги каби ташқи дунёга очиқ бўлганида, қирғиз тадбиркорлари ўзбек бизнеси билан рақобатлаша олмаган бўларди.
“Ҳаммамиз Ислом Каримовдан миннатдор бўлишимиз керак. У Ўзбекистондаги ўзбекларни дунёдан узиб қўйди. Шу орқали у қирғизлар ва қозоқлар учун имкониятлар яратди. Бунинг учун мен Ислом Каримовга Қирғизистонда ҳайкал қўйган бўлардим” — деди у.
Подкаст давомида Акаев Жанубий Кореянинг Daewoo компаниясининг Марказий Осиёдаги инвестициялари ҳақида ҳам фикр билдирди. Унинг айтишича, компания дастлаб Қирғизистонда автомобиль заводи қуришни ҳам кўриб чиққан, бироқ кейинчалик инвестиция учун Ўзбекистон танланган.
Собиқ президентнинг сўзларига кўра, у кейинчалик бу масалани Ислом Каримов билан ҳам муҳокама қилган.
“Бундай ишлаб чиқариш на ўзбекка, на қирғизга керак. Мен ҳатто кейин Ислом Каримовдан сўраганман. У ҳам бу қарор хато бўлганини айтган”, — деди Акаев.
Акаевнинг фикрича, Каримов давридаги иқтисодий ва ташқи сиёсатнинг нисбатан ёпиқ модели Қирғизистон ва Қозоғистон тадбиркорлари учун қўшимча имконият яратган. Шу билан бирга, BBC айрим иқтисодчилар бу қарашларга қўшилмаслигини ҳам келтиради.
Хусусан, исми ошкор этилмаган иқтисодий таҳлилчи йирик саноат лойиҳаларини фақат даромад нуқтаи назаридан баҳолаб бўлмаслигини, Ўзбекистонда автомобиль заводи қурилиши узоқ муддатли саноат ривожи учун муҳим қарор бўлганини таъкидлаган. Унинг фикрича, юзага келган муаммолар асосан бошқарув ва коррупция билан боғлиқ бўлган.
Шунингдек, BBC суҳбатлашган яна бир манба Акаевнинг баёноти Ўзбекистон ва Қирғизистон ўртасидаги ҳамкорлик масалалари муҳокама қилинаётган даврга тўғри келганига эътибор қаратиб, бундай чиқишлар ортида сиёсий ёки геосиёсий ҳисоб-китоблар бўлиши эҳтимолини ҳам истисно қилмаган.
