Олий таълимда янги таълим йўналишлари ва мутахассисликлар жорий этилди
Эндиликда олий таълим муассасаларида дронлар, мобил робототехника, яшил иқтисодиёт, урбанистика, халқаро сув дипломатияси ва бошқа замонавий йўналишлар бўйича ҳам мутахассислар тайёрланади.
Ўзбекистонда олий таълим йўналишлари ва мутахассисликлари классификаторига ўзгартириш ва қўшимчалар киритилди. Бу Олий таълим, фан ва инновациялар вазирининг буйруғи билан тасдиқланиб, Адлия вазирлигида давлат рўйхатидан ўтказилди.
Қайд этилишича, ўзгаришлардан кўзланган асосий мақсад олий таълим тизимини замонавий меҳнат бозори талабларига мослаштириш ҳамда иқтисодиётнинг истиқболли тармоқлари учун рақобатбардош мутахассислар тайёрлашдан иборат.
Ҳужжатга мувофиқ, бакалавриат босқичида экология ва атроф-муҳит, яшил иқтисодиёт, иқлим ўзгариши, қайта тикланувчи энергия, сув ресурсларини бошқариш, мобил робототехника, учувчисиз учиш аппаратлари (дронлар), барқарор қишлоқ хўжалиги, экотуризм ҳамда темир йўл муҳандислиги таълим йўналишлари жорий этилди.
Магистратура босқичида эса халқаро энергетик сиёсат, халқаро сув дипломатияси, циркуляр иқтисодиёт, барқарор молия, ривожланиш иқтисодиёти, экология ҳуқуқи, халқаро савдо ҳуқуқи, назарий ва муҳандислик физикаси, урбанистика, барқарор шаҳарсозлик, иқлимга чидамли ўрмон хўжалиги ҳамда барқарор туризм мутахассисликлари очилди.
Бундан ташқари, классификаторга яна бир қатор ўзгартиришлар киритилди. Хусусан, бакалавриатнинг 760-позициясидаги йўналиш “Хизмат фаолиятини тарбиявий-психологик таъминлаш” деб қайта номланди. Магистратуранинг 766-позициясидаги мутахассислик “Давлат ва ҳарбий бошқарув” номи билан тасдиқланди, 799-позиция эса классификатордан чиқарилди.
