Техникум битирувчилари учун ОТМларга 2-курсдан суҳбат асосида қабул бошланди
Қабул жараёни онлайн шаклда ўтказилади. Ҳужжат топширишда дипломнинг асл нусхасини тақдим этиш талаб этилмайди.
5 июлдан бошлаб техникумларни муваффақиятли тамомлаган битирувчиларни олий таълим муассасаларининг бакалавриат таълим йўналишларига 2-курсдан суҳбат асосида ўқишга қабул қилиш учун аризалар қабули бошланди. Бу ҳақда Олий таълим, фан ва инновациялар вазирлиги хабар берди.
Аризалар 25 июлга қадар (шу куни ҳам) my.edu.uz платформаси орқали онлайн қабул қилинади. Рўйхатдан ўтишда абитуриентлардан дипломнинг асл нусхаси талаб этилмайди. Фақат шахсни тасдиқловчи маълумотларни киритиш кифоя бўлиб, қолган зарур маълумотлар ахборот тизими томонидан автоматик шакллантирилади.
Мазкур тартиб техникумни муваффақиятли тамомлаган битирувчиларга татбиқ этилади. Бундай тоифага ўқув семестрлари якунларига кўра баҳолари асосан 4 ва 5 бўлган ҳамда баҳоларининг камида 50 фоизи (тиббиёт йўналишларида эса камида 85 фоизи) "5" баҳони ташкил этган битирувчилар киради.
Суҳбат натижаларига кўра, олий таълим ташкилоти комиссияси томонидан қўйилган балларнинг ўртача кўрсаткичи 67 балл ва ундан юқори бўлган абитуриентлар суҳбатдан ўтган деб ҳисобланади ҳамда тўлов-контракт асосида 2-курсдан талабаликка тавсия этилади.
Ушбу тартиб олий ҳарбий ва олий ҳарбийлаштирилган таълим муассасалари, Тошкент давлат юридик университети, шунингдек Ўзбекистонда фаолият юритаётган хорижий ва нодавлат олий таълим ташкилотлари ҳамда уларнинг филиалларига нисбатан қўлланилмайди.
