Ўзбекистонда 15 йиллик стажга эга тиббиёт ходимларига уй-жой учун субсидия берилади
Янги тартибга кўра, субсидия дастури доирасида уй-жойни мамлакатнинг исталган ҳудудидаги бирламчи бозордан ипотека кредити асосида харид қилиш мумкин бўлади.
Ҳукуматнинг 2026 йил 12 июндаги 310-сон қарори билан давлат тиббиёт муассасаларида камида 15 йиллик иш стажига эга тиббиёт ва фармацевтика ходимларини уй-жой билан таъминлаш мақсадида ипотека кредити асосида харид қилинадиган уй-жойнинг бошланғич бадалининг бир қисмини қоплаш тартиби тасдиқланди. Бу ҳақда “Ҳуқуқий ахборот” Теlegram-канали хабар берди.
Янги тартибга кўра, фуқаролар рўйхатдан ўтган ҳудудидан қатъи назар, мамлакатнинг исталган ҳудудидаги бирламчи уй-жой бозоридан субсидия дастури доирасида ипотека кредити асосида уй-жой харид қилиши мумкин.
Субсидия олиш учун аризалар Давлат хизматлари марказлари ёки my.gov.uz портали орқали қабул қилинади.
Ариза берувчиларни баҳолашда уларнинг амалда давлат тиббиёт муассасасида фаолият юритаётгани ҳамда давлат муассасаларда камида 15 йиллик иш стажига эга экани тасдиқланиши лозим.
Қарорга мувофиқ, субсидия бир оилага (эр ёки хотиндан бирига) фақат бир марта ажратилади. Ғолиблар ҳар чорак учун белгиланган квота доирасида мезонларга тўлиқ жавоб берган номзодлар орасидан онлайн тарзда тасодифий танлаш усули орқали аниқланади. Ҳар чоракда 125 нафар номзод субсидия олиш ҳуқуқини қўлга киритади.
Субсидия ажратилгани тўғрисидаги хабарномани олган ғолиб уй-жойни ипотека кредити асосида харид қилиш учун қурилиш (пудрат) ташкилоти билан дастлабки шартнома тузади.
