Сурхондарёдаги далада 4 кило “гашиш” топилди
Шунингдек, Жиззахда фуқаронинг ёнидаги хўжалик қопидан қарийб 5 кг каннабис ўсимлиги аниқланди.
Сурхондарё ва Жиззах вилоятларида Давлат хавфсизлик хизмати ҳамда Ички ишлар органлари ходимлари ҳамкорлигида ўтказилган тезкор тадбирлар давомида жами қарийб 9 килограмм гиёҳвандлик воситалари ноқонуний муомаладан олинди. Бу ҳақда ДХХ хабар берди.
Маълум қилинишича, Сурхондарё вилоятининг Термиз туманида ўтказилган тезкор тадбирда қишлоқ хўжалигига мўлжалланган дала майдонида номаълум шахслар томонидан қолдириб кетилган 4 килограмм «гашиш» моддаси аниқланиб, процессуал тартибда расмийлаштирилган.
Шунингдек, ДХХнинг Жиззах вилояти бўйича бошқармаси ва Ички ишлар органлари ҳамкорлигида ўтказилган тадбирда Зарбдор туманида яшовчи 1981 йилда туғилган фуқаро Жиззах шаҳрида текширилганида, унинг ёнидаги хўжалик қопи ичидан 4 килограмм 840 грамм каннабис ўсимлиги топилиб, ашёвий далил сифатида мусодара қилинган.
Мазкур ҳолатлар юзасидан жиноят ишлари қўзғатилиб, тергов доирасида ушбу қонунбузарликларга алоқадор шахсларни аниқлаш ва жавобгарликка тортиш бўйича зарур чоралар кўрилмоқда.
