Тошкентдаги “бассейн”ларда оммавий касалланиш ҳақидаги хабарлар рад этилди
Ижтимоий тармоқларда тарқалаётган хабарларга расмий муносабат билдирилди.
Тошкент шаҳридаги чўмилиш ҳавзаларида чўмилиш оқибатида фуқаролар оммавий касалланаётгани ҳақидаги хабарлар ўз тасдиғини топмади.
Бу ҳақда Тошкент шаҳар Санитария-эпидемиологик осойишталик ва жамоат саломатлиги бошқармаси расмий баёнот берди.
Маълум қилинишича, пойтахтда фаолият юритаётган 57 та чўмилиш ҳавзаси бошқарма ҳамда унинг туман бўлимлари томонидан мунтазам санитария-эпидемиологик назоратга олинган. Тасдиқланган режа асосида сув намуналари ҳар ой бактериологик ва санитария-гигиеник кўрсаткичлар бўйича лаборатория текширувларидан ўтказилади.
Жорий йил давомида чўмилиш ҳавзаларидан 1 044 та сув намунаси таҳлил қилинган. Санитария талабларига жавоб бермаган 7 та мавсумий чўмилиш ҳавзасида сув тўлиқ алмаштирилиб, ювиш ва зарарсизлантириш ишлари амалга оширилган.
Шунингдек, бошқарма маълумотига кўра, бугунги кунгача чўмилиш ҳавзаларида чўмилиш натижасида заҳарланиш ёки юқумли касалликлар билан боғлиқ бирорта ҳам шошилинч хабарнома келиб тушмаган.
Шу муносабат билан ижтимоий тармоқларда тарқалаётган оммавий касалланиш ҳақидаги хабарлар тасдиқланмаган ва ҳақиқатга тўғри келмайди.
