Нетаняху Буюк Британияни “Британия Ислом Республикаси” деб атади
У иборани Британия ОАВларининг Исроилни ёритиш услубини танқид қилар экан, ишлатган.
Исроил бош вазири Бинямин Нетаняху Буюк Британияни “Британия Ислом Республикаси” деб атади. У бу кинояли иборани Британия ОАВларининг Исроилни ёритиш услубини танқид қилар экан, ишлатган.
Аl Jazeera қайд этишича, унинг баёноти Исроил ва Буюк Британия ҳукуматлари ўртасидаги зиддиятлар кучайиб бораётган бир пайтга тўғри келмоқда.
Нетаняху бу фикрни 13 август куни эфирга узатилган Исроилнинг Мелеч Блитзер Haim подкастида билдирди. У суҳбат давомида 1967 йилдаги Олти кунлик уруш пайтида Исроилни ижобий ёритган британиялик журналист Рендолф Черчиллни мисол қилиб келтирди.
“Бугунги Британияда бундай ёритишни топинг-чи. Уни ъБритания Ислом Республикасиъ деб аташ мумкин”, — деди Нетаняху.
Исроил бош вазири кейинчалик Буюк Британиянинг ядровий қуролга эга “исломий давлат”га айланиши ҳақидаги фикрни ҳам тилга олди. У АҚШ вице-президенти Ж.Д. Венснинг аввалроқ билдирган шунга ўхшаш фикрларига ишора қилган.
“Кимдир ядровий қуролга эга бўлган биринчи Ислом Республикаси ъБритания Ислом Республикасиъ бўлади, деган эди. Биз бу ерда, Эронда, яна биттаси пайдо бўлмаслигини таъминлаяпмиз”, — деди Нетаняху.
Нетаняхунинг сўзлари Британия ва Ирландиядаги яҳудий жамоалари вакиллари томонидан танқид қилинди.
Прогрессив яҳудийлик ҳаракати ҳамраислари раввин Чарлей Багински ва раввин Жош Лев унинг баёнотини “хавфли ва масъулиятсиз” деб баҳолади.
Улар антисемитизм, мусулмонларга қарши нафрат ва жамиятдаги бўлинишлар кучайиб бораётган бир пайтда бундай тилдан фойдаланиш вазиятни янада кескинлаштиришини таъкидлади.
“Бош вазир Нетаняху Британия яҳудийлари номидан гапирмайди. Унинг сўзлари бизни ифодаламайди”, — деди улар.
Буюк Британиянинг собиқ бош вазири Тереза Мей даврида Даунинг-стрит аппарати раҳбари бўлган Гевин Барвелл эса Нетаняхунинг баёнотини “очиқдан-очиқ исломофобия” деб атади.
Исроил ва Буюк Британия тарихан яқин муносабатларга эга бўлган бўлса-да, 2024 йилда Лейбористлар партияси ҳокимиятга келганидан кейин икки давлат ҳукуматлари ўртасидаги зиддиятлар кучайди.
Собиқ бош вазир Кир Стармер даврида Буюк Британия Исроил билан эркин савдо бўйича музокараларни тўхтатган ва қурол-яроғ экспортига берилган айрим лицензияларни тўхтатиб қўйган.
Шунингдек, Буюк Британия Исроил ҳукуматидаги ўта ўнгчи вазирлар Итамар Бен-Гвир ва Безалел Смотричга нисбатан санкциялар жорий этган.
2025 йилда эса Буюк Британия Франция ва Канада каби иттифоқчилари қаторида Фаластин давлатини тан олган. Буюк Британия бош вазири Энди Бернхем ҳам яқинда Лейбористлар партиясининг Исроилнинг Ғазодаги ҳаракатларига дастлабки муносабати учун узр сўраган. У партия ўт очишни тўхтатишга чақиришда жуда суст ҳаракат қилганини билдирган.
Бернхем Ғазодаги зўравонликка алоқадор шахсларга нисбатан қўшимча санкциялар жорий этиш ҳамда ноқонуний аҳоли пунктлари билан савдо қилувчи товарларни тақиқлаш каби чораларни кўриб чиқиш зарурлигини айтган.
Лондон Университет коллежининг халқаро муносабатлар бўйича доценти Родван Абоуҳарб Нетаняхунинг Буюк Британияга нисбатан кинояли баёнотини икки давлат муносабатларидаги “янги тубанлик” деб баҳолади.
Шу билан бирга, у Исроил ва Буюк Британиянинг Эронга нисбатан сиёсий мақсадларида сезиларли муштараклик мавжудлигини қайд этди.
Абоуҳарбнинг фикрича, Нетаняхунинг баёноти ички сиёсий мақсадларга, жумладан, унинг заифлашиб бораётган ҳукмрон коалициясини мустаҳкамлашга қаратилган бўлиши мумкин.
