Хивада Ляонин педагогика университети филиали очилди
Мажмуани қуриш ва жиҳозлаш учун давлат бюджетидан 140 миллиард сўм ажратилган бўлиб, бу ерда 120 та янги иш ўрни яратилган.
Президент Шавкат Мирзиёев Хива шаҳрида ташкил этилган Ляонин педагогика университетининг Ўзбекистондаги филиали ҳамда Конфуций институти фаолияти билан танишди.
Мамлакатда олий таълимни халқаро стандартлар асосида ривожлантириш, хорижий нуфузли университетлар билан ҳамкорликни кенгайтириш ва замонавий йўналишларда малакали кадрлар тайёрлашга алоҳида эътибор қаратилмоқда.
Олий таълим, фан ва инновациялар вазирлиги, Абу Райҳон Беруний номидаги Урганч давлат университети ҳамда Хитойнинг Ляонин педагогика университети ҳамкорлигида янги таълим мажмуаси барпо этилди.
Мажмуани қуриш ва жиҳозлаш учун давлат бюджетидан 140 миллиард сўм ажратилган бўлиб, бу ерда 120 та янги иш ўрни яратилган.
Таълим мажмуасида 560 ўринли ўқув блоклари, кутубхона, спорт зали, 200 ўринли маданият саройи ва 118 ўринли ошхона мавжуд. Шунингдек, иккинчи тўрт қаватли бинода 628 ўринли аудиториялар ва 224 ўринли талабалар турар жойи ташкил этилган.
2026 йил учун филиалга қабул квотаси 160 нафар этиб белгиланган. Келгусида йиллик қабулни 500 нафарга, талабалар сонини эса 2 минг нафарга етказиш режалаштирилмоқда.
Бу ерда таълим кундузги ва масофавий шаклларда, ўзбек, хитой ва инглиз тилларида олиб борилади. Бакалавриат босқичида халқаро хитой тили таълими, туризм бошқаруви, халқаро бизнес ва сунъий интеллект йўналишлари бўйича кадрлар тайёрланади.
Магистратура босқичида эса Хитой тили ва маданиятини ўқитиш методикаси, таълим бошқаруви, шунингдек, сунъий интеллект ва таълим технологиялари йўналишлари йўлга қўйилган.
Филиал дипломи Ўзбекистонда тўғридан-тўғри тан олинади. Иқтидорли битирувчиларга Хитойнинг етакчи олий таълим муассасаларида грант асосида ўқишни давом эттириш ҳамда нуфузли ташкилотларда стажировка ўташ имконияти яратилади.
Айни пайтда Хоразм вилоятида хитойлик инвесторлар иштирокида умумий қиймати 2 миллиард 343 миллион долларлик 38 та йирик лойиҳа амалга оширилмоқда. Мазкур лойиҳаларда замонавий технологияларни яхши биладиган ва хитой тилини пухта эгаллаган малакали мутахассисларга эҳтиёж юқори.
Янги таълим муассасаси ва Конфуций институти ана шу эҳтиёждан келиб чиқиб, меҳнат бозори талабларига мос кадрлар тайёрлашга хизмат қилади.
Давлат раҳбари таълим дастурларини иқтисодиёт ва меҳнат бозори эҳтиёжлари билан уйғунлаштириш, талабалар замонавий технологиялар ва хорижий тилларни пухта эгаллаши учун зарур шароитларни яратиш муҳимлигини таъкидлади.
Ташриф давомида Президентга ягона миллий туризм платформаси ҳамда туризм соҳасида тадбиркорлар учун яратилаётган янги имконият ва енгилликлар ҳам тақдимот қилинди.
