UzQR олиш жараёни рақамлаштирилди: энди аризани онлайн юбориш мумкин

“Бизнесни ривожлантириш банки” АТБ томонидан тадбиркорлар учун UzQR олиш жараёни рақамлаштирилди. Бу ҳақда банк ахборот хизмати хабар берди.

 

Маълум қилинишича, эндиликда тадбиркорлар QR-код олиш учун банк офисига бориши шарт эмас. Барча жараённи Бизнес 24/7 иловаси орқали масофадан туриб амалга ошириш мумкин.

 

Янги имконият тадбиркорларга вақтни тежаш, тўловларни қабул қилиш жараёнини соддалаштириш ва савдо нуқталарида ҳисоб-китобларни янада қулай ташкил этиш имконини беради.

 

Тадбиркорлар UzQR орқали турли банклар ва тўлов иловаларидан келадиган тўловларни битта QR-код ёрдамида қабул қилишлари мумкин. Бунинг учун бир нечта QR-код ёки қўшимча қурилмалардан фойдаланишга эҳтиёж қолмайди. QR орқали амалга оширилган тўловлар тадбиркорнинг банк ҳисобварағига тушади, барча операцияларни эса ягона платформа орқали кузатиб бориш мумкин. Натижада кассадаги ортиқча жараёнлар қисқариб, мижозларга хизмат кўрсатиш тезлашади.

 

UzQR харидорлар учун ҳам қулайлик яратади. Улар ўзларига қулай бўлган исталган банк ёки тўлов иловаси орқали тўловни амалга оширишлари мумкин. Бу нақд пулсиз ҳисоб-китобларни кенгайтириш билан бирга, тўлов жараёнини тез ва содда ташкил этиш имконини беради.

 

UzQR олиш учун тадбиркор Biznes 24/7 иловасида “Ягона QR” бўлимига кириб, ариза юбориши, унинг ҳолатини кузатиши, QR-кодни яратиши ва юклаб олиши мумкин. Жараён қуйидаги кетма-кетликда амалга оширилади: Ягона QR → Ариза юбориш → Ҳолатини кузатиш → QR яратиш → Юклаб олиш.

 

“Бизнесни ривожлантириш банки” АТБ рақамли хизматларни ривожлантириш орқали тадбиркорларнинг банк хизматларидан фойдаланишини янада соддалаштириш, шунингдек, улар учун вақт ва харажатларни тежайдиган ечимларни кенгайтиришни давом эттираётганини билдирди.