Тимур Исмоилов ИИВ вазирининг биринчи ўринбосари этиб тайинланди
У бунга қадар Сурхондарё вилояти ИИБ бошлиғи лавозимида фаолият юритган.
Ўзбекистон Президентининг тегишли қарорига мувофиқ, полковник Тимур Камалитдинович Исмоилов Ўзбекистон Республикаси ички ишлар вазирининг биринчи ўринбосари — Жамоат хавфсизлиги департаменти бошлиғи лавозимига тайинланди.
Шу муносабат билан у Сурхондарё вилояти Ички ишлар бошқармаси бошлиғи лавозимидан озод этилди.
Тимур Исмоилов 1983 йилда Қорақалпоғистон Республикаси Тўрткўл туманида туғилган. У ички ишлар органлари тизимида турли масъул ва раҳбарлик лавозимларида фаолият юритган.
Жумладан, Тимур Исмоилов ИИВ Терроризм ва экстремизмга қарши курашиш бош бошқармаси бошлиғи лавозимида ҳам хизмат қилган. Сўнгги тайинловига қадар эса Сурхондарё вилояти ИИБ бошлиғи сифатида фаолият олиб борган.
Янги лавозимида унга жамоат хавфсизлигини таъминлаш, ҳуқуқбузарликлар профилактикаси ва жиноятчиликнинг барвақт олдини олиш тизимини янада такомиллаштириш бўйича истиқболли вазифалар юклатилган.
