Шаҳноза Мирзиёева Мусулмон Юнусовнинг мурожаати юзасидан муносабат билдирди
У болалар ва уларнинг оилалари учун эрта аралашув, реабилитация, абилитация, кундузги парвариш ва уйда ёрдам кўрсатиш хизматлари бепул эканини таъкидлади.
Ижтимоий тармоқларда актёр Мусулмон Юнусовнинг фарзандига ногиронликни расмийлаштириш жараёнида дуч келган қийинчиликлари муҳокама қилинмоқда.
Мазкур ҳолат Шаҳноза Мирзиёева томонидан атрофлича ўрганилиб, оилага амалий ёрдам кўрсатилгани маълум қилинди.
Шаҳноза Мирзиёева ногиронликни белгилаш тартиби барча фуқаролар учун ягона ва шаффоф эканини таъкидлади.
Шунингдек, жорий йилда йўлга қўйилган эрта аралашув, реабилитация ва абилитация, кундузги парвариш ҳамда уйда ёрдам кўрсатиш хизматлари болалар ва уларнинг оилалари учун мутлақо бепул экани қайд этилди.
Агар ногиронликни белгилаш жараёнининг бирор босқичида оиладан пул талаб қилинса ёки жараён асоссиз равишда чўзилса, бу қонунчиликнинг бевосита бузилиши ҳисобланиши ва бундай ҳолатни ҳеч қандай сабаб билан оқлаб бўлмаслиги таъкидланди.
Шаҳноза Мирзиёева фуқароларнинг билдирилаётган фикр-мулоҳазалари ва мурожаатлари учун миннатдорлик билдирди. Унинг қайд этишича, йирик тизимда мавжуд барча камчиликларни дарҳол аниқлаш ҳар доим ҳам имкони бўлмайди. Шу боис фуқароларнинг мурожаатлари тизимдаги заиф нуқталарни аниқлаш ва уларни бартараф этишда муҳим аҳамият касб этади.
Шаҳноза Мирзиёева учун жорий этилаётган хизматларнинг инсонларга амалий наф келтириши, ҳар бир фуқаро учун тенг, манзилли ва қулай бўлиши муҳим экани қайд этилди.
