Иорданияда черковга қуролли ҳужум: етти киши ҳалок бўлди, 34 киши яраланди
Дафн маросими вақтида черковга бостириб кирган қуролланган шахслар ўт очган.
Иорданиянинг Карак муҳофазасидаги черковда дафн маросими вақтида содир этилган қуролли ҳужум оқибатида камида етти киши ҳалок бўлди, 34 киши яраланди. Ҳужумчиларни қидириш ишлари давом этмоқда, деб хабар берди Al Jazeera.
Иордания Жамоат хавфсизлиги бошқармаси директори Убайдуллоҳ ал-Маайтанинг жума куни маълум қилишича, ҳужум Ҳамуд қишлоғидаги юнон православ черковида содир бўлган. Яраланганларнинг 27 нафари шифохоналарда даволанмоқда.
Гувоҳларнинг айтишича, дафн маросими бошланиши билан портлаш овози эшитилган, шундан сўнг ниқоб таққан икки қуролли шахс черковга бостириб кириб, бир неча дақиқа давомида ўқ узган. Ҳужумчилардан бири тўппонча, иккинчиси эса милтиқ кўтарган.
Давлатга қарашли “Al-Мamlaka” телеканали хавфсизлик кучлари икки гумонланувчини қидираётганини хабар қилди. Ҳозирча ҳужум учун жавобгарликни ҳеч ким ўз зиммасига олмаган.
Иордания ички ишлар вазири Мазен ал-Фарая ҳодисани мисли кўрилмаган террорчилик ҳужуми деб атади. Қирол Абдулла II эса ҳужумчилар энг қаттиқ жазога тортилишини билдирди.
