Ўқитувчиларнинг мукофот пулидан нега солиқ ушланади? Вазирлик изоҳ берди
Мактабгача ва мактаб таълими вазирлиги ижтимоий тармоқларда тарқалган хабарларга муносабат билдирди.
Ижтимоий тармоқларда 1 октябрь — Ўқитувчи ва мураббийлар куни муносабати билан умумтаълим муассасалари ходимларига тўланган мукофот пулларидан даромад солиғи ушланганига оид хабарлар турли муҳокамаларга сабаб бўлди.
Мактабгача ва мактаб таълими вазирлиги матбуот котиби Дилфуза Собирова мазкур ҳолат юзасидан расмий изоҳ берди.
Қайд этилишича, Вазирлар Маҳкамасининг 2019 йил 30 сентябрдаги 823-сон қарорига мувофиқ, 1 октябрь — Ўқитувчи ва мураббийлар куни муносабати билан умумтаълим муассасалари ходимлари Директор жамғармаси маблағлари ҳисобидан меҳнатга ҳақ тўлаш энг кам миқдорининг 75 фоизигача миқдорда мукофотланиши мумкин.
Вазирликнинг тушунтиришича, Солиқ кодексининг тегишли моддаларига кўра, ушбу мукофот рағбатлантириш хусусиятига эга тўлов ҳисобланади. Шу сабабли у ходимнинг жами даромадлари таркибига киритилади ва ундан даромад солиғи ундирилади.
Вазирлик алоҳида таъкидлаганидек, Солиқ кодексида айрим турдаги пул мукофотлари учун бошқа тартиб белгиланган.
Жумладан, Ўзбекистон Президенти ёки Вазирлар Маҳкамаси қарори асосида бир йўла бериладиган пул мукофотлари жисмоний шахснинг жами даромади таркибига киритилмайди. Шу сабабли бундай тўловлардан даромад солиғи ушланмайди.
Масалан, “Йил ўқитувчиси” танлови ғолибларига Президент ёки Ҳукумат қарори асосида тўланадиган бир марталик пул мукофотлари ушбу тоифага киради.
