Энди фуқаролар Президент Халқ қабулхонасига юборилган ўз мурожаатини назорат қилади

 

Фуқароларнинг давлат органларига юборган мурожаатларини кузатиши ва улар бўйича берилган жавобларга муносабат билдириши учун янги имконият яратилди.

 

Президент Халқ қабулхонаси Рақамли технологиялар вазирлиги билан ҳамкорликда қайта алоқа — SMS-хабарнома юбориш хизматини ишга туширди.

 

Эндиликда мурожаатнинг кўриб чиқилиш жараёнидаги ҳар бир босқич ҳақида фуқаронинг pm.gov.uz сайтида рўйхатдан ўтган телефон рақамига SMS орқали хабар бериб борилади. Шунингдек, фуқаро мурожаатининг ҳолатини сайтдаги шахсий кабинети орқали реал вақт режимида кузатиши мумкин.

 

Мурожаат кўриб чиқилиб, унга жавоб берилгач, фуқарога махсус ҳаволани ўз ичига олган SMS-хабарнома юборилади. Ҳавола орқали шахсий кабинетга кириб, мурожаат юзасидан берилган жавоб билан танишиш ва унга ўз муносабатини билдириш мумкин.

 

Агар фуқаро берилган жавобдан қониқса ёки мурожаатида кўтарилган масала ҳал этилган бўлса, «Розиман» тугмасини босади.

 

Аксинча, жавобдан норози бўлса ёки муаммо ҳал этилмаган деб ҳисобласа, “Эътирозим бор” тугмасини босиши мумкин. Бундай ҳолатда мурожаат қайта ижрога қайтарилиб, масала яна кўриб чиқилади.

 

Янги хизмат мурожаатларни кўриб чиқиш жараёнининг шаффофлигини ошириш, фуқароларнинг ўз мурожаатлари устидан назоратини кучайтириш ҳамда давлат органлари билан қайта алоқани яхшилашга хизмат қилади.