Кредит қарзини ундиришда банк картасида камида 680 минг сўм қолдириш таклиф этилмоқда

Марказий банк кредит қарздорлигини ундиришда мижознинг барча банк карталаридан маблағларни тўлиқ ечиб олишни чеклашни таклиф қилмоқда. Унга кўра, қарздорнинг банк карталари ҳисобларида камида 680 минг сўм қолдирилиши керак бўлади.

 

Тегишли ўзгартиришлар банк хизматлари истеъмолчилари билан муносабатларда тижорат банклари фаолиятига қўйиладиган минимал талаблар тўғрисидаги низомга киритилиши режалаштирилмоқда. Лойиҳа жамоатчилик муҳокамасига қўйилган.

 

Ҳужжатга кўра, кредит ёки кафиллик бўйича тўловлар мижознинг топшириғисиз ундирилганда, банк унинг барча банк карталари ҳисобларида энг кам иш ҳақининг ярмига тенг маблағни сақлаб қолиши керак бўлади.

 

Ҳозирда энг кам иш ҳақи 1 млн 360 минг сўм этиб белгиланган. Унинг ярми 680 минг сўмни ташкил қилади.

 

Бунда шартномада мажбурий реквизитлари кўрсатилган ва/ёки қарздорлик бўйича тўловларни ундириш учун банкнинг мобил иловасига уланган банк карталари бундан мустасно бўлади.

 

Аввалроқ UZCARD автоматик акцептсиз ечиб олиш хизмати шартларини ўзгартиргани ҳақида хабар берилган эди. 15 апрелдан бошлаб қарздорликни ундиришда банклар мижоз картасида камида 3 БҲМ миқдоридаги камайтирилмайдиган қолдиқни сақлаши керак. Бироқ мазкур қоида UZCARD тўлов тизими доирасида амал қилади.

 

Марказий банк янги таклиф орқали ушбу чекловни тижорат банклари фаолиятига қўйиладиган талаблар даражасида белгилашни режалаштирмоқда.

 

Лойиҳа муҳокамаси 14 сентябргача давом этади.