Тошкентдаги мактабда 3-синф ўқувчиси темир ютишга мажбурланди
Бола ёт жисмни ютиб юборгач, шифохонага ётқизилиб, операция қилинган.
Ижтимоий тармоқларда Тошкент шаҳрида мактаб ўқувчиси оғир ҳолатда шифохонага ётқизилгани ҳақида хабарлар тарқалди. Мазкур ҳолат Болалар омбудсмани томонидан назоратга олиниб, ўрганилмоқда.
Аниқланишича, 2 сентябрь куни Тошкент шаҳрининг Яшнобод туманидаги мактабда 3-синф ўқувчиси юқори синф ўқувчилари томонидан таҳдид қилингани ва унинг қаршилигига қарамай, оғзига номаълум жисм солингани айтилмоқда. Бола ушбу жисмни ютиб юборган.
5 сентябрь куни ўқувчининг соғлиғи ёмонлашиб, қорин қисмидаги кучли оғриқ сабаб шифохонага ётқизилган. Тиббий текширувлар давомида унинг ички аъзолари қисмида ёт жисм аниқланиб, шошилинч операция орқали олиб ташланган.
Ҳозирда боланинг аҳволи қониқарли экани ва унга зарур тиббий муолажалар кўрсатилаётгани маълум қилинди.
Мазкур ҳолат юзасидан туман Ички ишлар бўлими томонидан терговга қадар текширув олиб борилмоқда.
Болалар омбудсмани боланинг бузилган ҳуқуқларини тиклаш ҳамда таълим муассасасида болалар хавфсизлигини таъминлаш нуқтаи назаридан ҳолатни кузатиб бормоқда. Омбудсман котибияти ходимлари вазиятни жойига чиққан ҳолда ўрганмоқда.
Ҳолат юзасидан қўшимча маълумот берилиши билдирилган.
