“Damas”да 25 нафар боғча боласини олиб кетаётган ҳайдовчи ушланди
Ҳайдовчи аввал маст ҳолда автомобиль бошқаргани учун суд қарори билан ҳайдовчилик ҳуқуқидан маҳрум этилгани аниқланган.
4 сентябрь куни Тошкент шаҳри Яшнобод туманидаги Оҳангарон кўчасида ЙПХ инспектори томонидан тўхтатилган Damas автомобилида белгиланган меъёрдан ортиқ йўловчи ташилаётгани аниқланди. Бу ҳақда пойтахт ИИББ хабар берди.
Текширув вақтида автомобиль ичида 25 нафар боғча боласи бўлгани маълум бўлган. Мазкур Damas эса атиги 7 нафар йўловчига мўлжалланган.
Ҳайдовчининг ҳужжатлари текширилганда, унда транспорт воситасини бошқариш ҳуқуқини берувчи ҳужжат мавжуд эмаслиги аниқланган. Маълум бўлишича, ҳайдовчи аввал маст ҳолда транспорт воситасини бошқаргани учун суд қарори билан ҳайдовчилик ҳуқуқидан маҳрум этилган.
Ҳайдовчи болаларни хавф остида қолдиргани учун уларнинг ота-оналари ва боғча ходимларидан узр сўраган. У келгусида тегишли ҳужжатларни олиб, қонун-қоидаларга риоя қилган ҳолда ҳаракатланишини билдирган.
Транспорт воситаси вақтинча сақлаш учун жарима майдонига жойлаштирилган.
