Хива, Бухоро ва Тошкент ўртасида янги электропоездлар қатнови йўлга қўйилади
Хива — Бухоро — Хива йўналишида 9 сентябрдан, Бухоро — Тошкент — Бухоро йўналишида эса 14 сентябрдан янги электропоездлар қатнай бошлайди.
«Ўзтемирйўлйўловчи» матбуот хизматининг маълум қилишича, йўловчиларга қўшимча қулайлик яратиш мақсадида Хива — Бухоро — Хива ҳамда Бухоро — Тошкент — Бухоро йўналишларида замонавий «CRRC-Dalian» электропоездлари қатнови йўлга қўйилади.
Янги электропоездлар 2026 йил 9 сентябрдан бошлаб Хива — Бухоро — Хива йўналишида, 14 сентябрдан эса Бухоро — Тошкент — Бухоро йўналишида ҳаракатланади.
Электропоезд таркиби 5 та вагондан иборат бўлиб, жами 415 та эконом класс ўриндиғига эга.
Хива — Бухоро — Хива
707-сонли Хива — Бухоро-1 электропоезди сешанба кунидан ташқари, ҳафтанинг барча кунлари қатнайди.
Хива — 09:55
Бухоро — 14:32
706-сонли Бухоро-1 — Хива электропоезди эса душанба кунидан ташқари, ҳафтанинг барча кунлари ҳаракатланади.
Бухоро — 15:45
Хива — 20:25
Бухоро — Тошкент — Бухоро
701-сонли Бухоро-1 — Тошкент электропоезди 14 сентябрдан бошлаб ҳар душанба куни қатнайди.
Бухоро — 15:17
Тошкент — 21:22
702-сонли Тошкент — Бухоро-1 электропоезди эса 15 сентябрдан бошлаб ҳар сешанба куни ҳаракатланади.
Тошкент — 10:05
Бухоро — 15:17
Янги электропоездлар қатнови йўлга қўйилиши муносабати билан айрим йўловчи поездларининг ҳаракат жадвалига ҳам ўзгартиришлар киритилади.
Жумладан, 56-сонли Тошкент жанубий — Хива, 58-сонли Тошкент жанубий — Шовот, 127/128-сонли Андижон — Қўнғирот, 301-сонли Душанбе — Тошкент, 6412-сонли Тошкент жанубий — Ховос ҳамда 6353-сонли Урганч — Нукус поездларининг қатнов жадвали ўзгаради.
Йўловчилардан сафарларини режалаштиришда янгиланган ҳаракат жадвалига эътибор қаратиш сўралмоқда.
