“Жонли контейнер”: 555 грамм олтин танага яширилди
Ҳиндистонга учиб кетмоқчи бўлган 5 нафар фуқаронинг ички органларидан жами 555 грамм қуйма олтин ва 200 грамм заргарлик буюмлари аниқланди.
Давлат хавфсизлик хизматининг Наманган вилояти бўйича бошқармаси ҳамда вилоят Божхона бошқармаси ходимлари ҳамкорлигида Наманган аэропортида тезкор тадбир ўтказилди.
Тадбир давомида “Наманган – Деҳли” йўналиши бўйича Ҳиндистонга учиб кетмоқчи бўлган Андижон ва Фарғона вилоятларида яшовчи 5 нафар фуқаро махсус текширувдан ўтказилган.
Текширув натижасида фуқаролар ўзларининг ички органларидан фойдаланиб, жами 555 грамм қуйма олтин бўлаклари ҳамда 200 грамм заргарлик буюмларини яширин равишда хорижга олиб чиқишга уринганликлари аниқланган.
Дастлабки ҳисоб-китобларга кўра, аниқланган қимматбаҳо металларнинг умумий тахминий қиймати 1,1 млрд сўмни ташкил этади.
Ҳолат юзасидан ҳозирда терговга қадар текширув ишлари олиб борилмоқда.
