Аэропортда «рейд»: 166 млн сўмлик тиббий буюмлар тўхтатиб қолинди
Ҳозирда улар ашёвий далил сифатида олиниб, ҳолат юзасидан белгиланган тартибда тегишли ишлар олиб борилмоқда.
Тошкент халқаро аэропортида ўтказилган божхона назорати тадбирлари давомида товарларни белгиланган тартибда божхона назоратига тақдим этмаслик ҳолати аниқланди.
«Тошкент-АЭРО» ихтисослаштирилган божхона комплекси маълум қилишича, йўловчининг юклари текширилганда, божхона назоратига тақдим этилмаган жами 68 қути, 7 турдаги ва номдаги 520 дона стоматологик буюмлар ҳамда 2 пачка насадкалар борлиги аниқланган.
Мазкур ашёвий далилларнинг дастлабки қиймати 166 миллион 300 минг сўмни ташкил этади. Ҳозирда ҳолат юзасидан белгиланган тартибда тегишли ишлар олиб борилмоқда.
Эслатиб ўтамиз, аввалроқ Тошкент халқаро аэропортида мобил қурилмаларни ноқонуний олиб кириш билан боғлиқ бир нечта ҳуқуқбузарлик ҳолатлари аниқланганди.
