Шавкат Мирзиёев озиқ-овқат хавфсизлигига бағишланган халқаро анжуман иштирокчиларига табрик йўллади
Президент дунёда 645 миллиондан ортиқ одам очликдан азият чекаётганини таъкидлаб, озиқ-овқат хавфсизлигини таъминлаш учун халқаро ҳамкорликни кучайтиришга чақирди.
Шавкат Мирзиёев Халқаро пахта куни ҳамда денгизга чиқиш имконияти бўлмаган ривожланаётган давлатларнинг озиқ-овқат хавфсизлигига бағишланган халқаро анжуманлар иштирокчиларига мурожаат йўллади.
Давлат раҳбари дунёнинг 30 дан зиёд мамлакатдан олим ва экспертлар, тадбиркорлар ҳамда халқаро ташкилотлар вакиллари ушбу форумларда иштирок этаётганини қайд этди.
Шавкат Мирзиёев Ўзбекистон деҳқонларининг пахтачилик борасида катта тажрибага эга эканини таъкидлади. Сўнгги йилларда амалга оширилган ислоҳотлар натижасида соҳа янги босқичга кўтарилгани, ғўзанинг 300 га яқин эртапишар нави яратилгани маълум қилинди.
Шунингдек, пахта экиш, парваришлаш ва йиғиб олиш жараёнлари тўлиқ механизациялаштирилгани, замонавий агротехнологиялар ҳисобига фермерлар гектарига 100 центнергача ҳосил олаётгани қайд этилди.
Президентнинг таъкидлашича, иқлим ўзгариши, сув танқислиги ва қурғоқчилик билан бир қаторда, логистика занжирларидаги узилишлар ҳам озиқ-овқат нархларининг ошишига сабаб бўлмоқда.
ФАО маълумотларига кўра, дунё бўйича 645 миллиондан ортиқ одам очликдан азият чекмоқда. Халқаро экспертлар тегишли чоралар кўрилмаса, 2028 йилга бориб бу кўрсаткич 1 миллиардга етиши мумкинлигини қайд этган.
Шавкат Мирзиёев бундай хавфларни бартараф этиш кўп томонлама шериклик ва давлатларнинг биргаликдаги саъй-ҳаракатларини талаб қилишини таъкидлади.
Айниқса, денгизга чиқиш имконияти бўлмаган давлатлар учун юқори транспорт харажатлари ва транзит мамлакатлардаги муаммолар жиддий тўсиқ бўлиб қолаётгани қайд этилди.
Ўзбекистон озиқ-овқат маҳсулотлари логистикаси ва савдосини эркинлаштириш, шунингдек, озиқ-овқат етказиб беришни тартибга солувчи қоидаларни соддалаштириш тарафдори экани билдирилди.
Мамлакат 2030 йилгача озиқ-овқат маҳсулотлари ишлаб чиқаришни 2 баробар, экспорт ва қўшилган қийматни эса 3 карра оширишни мақсад қилган.
Президент ушбу мақсадларга эришиш учун халқаро ташкилотлар ва хорижий давлатлар билан ҳамкорликни янада кучайтириш зарурлигини таъкидлади.
Шунингдек, Марказий Осиёдан бошлаб, денгизга чиқиш имконияти бўлмаган давлатлар ва транзит ҳамкорларни боғлайдиган озиқ-овқат ҳамкорлиги дастурини ишлаб чиқиш таклиф қилинди.
Халқаро молия институтлари ва хусусий инвесторлар озиқ-овқат маҳсулотларини қайта ишлаш, совуткичли сақлаш ва ташиш бўйича қўшма лойиҳаларни амалга оширишга чақирилди.
Шавкат Мирзиёев халқаро форумлар янги ташаббус ва стратегияларни ҳаётга татбиқ этиш ҳамда озиқ-овқат хавфсизлигини таъминлаш бўйича ҳамкорликни кучайтиришда муҳим қадам бўлишига ишонч билдирди.
