Ўзбекистон Президенти МДҲ мамлакатлари миллий таомлари фестивалида бўлди

Ўзбекистон Президенти Шавкат Мирзиёев Мустақил Давлатлар Ҳамдўстлиги мамлакатлари делегациялари раҳбарлари билан биргаликда Туркманистоннинг «Аваза» миллий сайёҳлик зонасида ўтказилган миллий таомлар фестивалида иштирок этди.

 

Тадбирда МДҲнинг тўққиз мамлакати — Ўзбекистон, Озарбайжон, Арманистон, Беларусь, Қозоғистон, Қирғизистон, Россия, Тожикистон ва Туркманистоннинг миллий ошхонаси пазандачилик анъаналари намойиш этилди.

 

Ўзбекистон экспозициясида мамлакатнинг турли ҳудудларига хос нон ва пишириқлар, қандолат маҳсулотлари ҳамда қуритилган мевалар тақдим қилинди. Меҳмонларга ўзбек нонвойчилигининг қадимий анъаналари ҳақида маълумот берилди.

 

Шунингдек, фестиваль меҳмонлари сомсанинг турли турлари, Хоразмга хос шивит оши ва тухумбарак тайёрланиш жараёнларини томоша қилди. Ўзбек паловининг турли кўринишлари ва миллий ошхонанинг бошқа таомлари ҳам намойиш этилди.

 

Ўзбекистон стендида миллий ҳунармандчилик маҳсулотларига ҳам алоҳида ўрин берилди. Риштон, Бухоро, Марғилон ва Самарқандлик ҳунармандлар ўз маҳсулотлари ҳамда уларни тайёрлашнинг анъанавий усулларини кўрсатиб берди.

 

Миллий куй-қўшиқлар ва рақслар фестивалга ўзига хос байрамона кайфият бағишлади.

 

Шавкат Мирзиёев ва бошқа делегациялар раҳбарлари Ўзбекистон экспозицияси билан танишганидан сўнг фестивалда тақдим этилган бошқа мамлакатларнинг миллий таомлари ва маданий намуналари билан ҳам танишди.