Иссиқлик электр станцияларида 9 ойда 7 млн куб метр табиий газ тежалди
2026 йилнинг дастлабки тўққиз ойида қарийб 28 млн кВт·соат электр энергияси ишлаб чиқарилди ва тежалди.
ОАВ учун контент тайёрлаш марказида ўтказилган брифингда «Иссиқлик электр станциялари» АЖ ишлаб чиқариш бош бошқармаси бошлиғи Ғолибжон Салимёров энергия самарадорлигини ошириш ва муқобил энергия манбаларини жорий этиш бўйича амалга оширилаётган ишлар ҳақида маълумот берди.
Бугунги кунда жамият тизимида жами 15,9 мегаватт қувватга эга қуёш фотоэлектр станциялари ўрнатилган. 2026 йилнинг январь–сентабр ойларида улар орқали 14,6 млн кВт·соат электр энергияси ишлаб чиқарилиб, 3,7 млн куб метр табиий газ тежалди.
Энергия самарадорлигини ошириш мақсадида 1 520 та автоном қуёш чироғи, 1 783 та ҳаракат датчиги ва электр двигателларига 181 та частота ўзгартиргич ўрнатилди. Ушбу чора-тадбирлар натижасида қўшимча 13,2 млн кВт·соат электр энергияси тежалиб, яна 3,3 млн куб метр табиий газ иқтисод қилинди.
Шунингдек, тизимдаги корхоналарда ҳар бири 200 литр сиғимга эга 117 та қуёш сув иситкичи ўрнатилди. Умуман, йилнинг дастлабки тўққиз ойида қарийб 28 млн кВт·соат электр энергияси ишлаб чиқарилди ва тежалди, 7 млн куб метр табиий газ иқтисод қилинди. Натижада атмосферага тахминан 9–11 минг тонна карбонат ангидрид чиқарилишининг олди олинди.
Энергия тежовчи технологияларни жорий этиш, қайта тикланувчи энергия манбаларидан фойдаланишни кенгайтириш ва электр станцияларининг ўз эҳтиёжлари учун сарфланадиган энергия миқдорини камайтириш ишлари изчил давом эттирилади.
