Ўзбекистонда чорваларда оқсил касаллиги хавфи сабаб санитария ойлиги эълон қилинди
48 та давлатда оқсил касаллигининг янги типлари қайд этилгани маълум қилинди.
Ўзбекистонда чорва ҳайвонлари орасида юқумли касалликлар тарқалишининг олдини олиш мақсадида 18 aпрелдан 18 майгача “Чорвачиликда санитария-эпидемия-гигиена” ойлиги эълон қилинди.
Қишлоқ хўжалиги вазирлиги ҳамда Фермерлар кенгаши томонидан фермерлар, деҳқон хўжаликлари раҳбарлари ва чорвадорларга йўлланган мурожаатда қайд этилишича, бугунги кунда глобал иқлим ўзгариши ва экологик мувозанатнинг бузилиши оқибатида дунёнинг турли ҳудудларида чорва ҳайвонлари орасида янги касалликлар юзага келмоқда.
Хусусан, хорижий мамлакатларда чорва моллари ўртасида оқсил (яшур) касаллиги тарқалиш хавфи кучайгани билдирилди. Жаҳон ҳайвонлар соғлиги ташкилоти маълумотларига кўра, 2025–2026 йилларда 48 та давлатда ушбу касалликнинг янги “SAT” типлари аниқланган бўлиб, амалда қўлланилаётган вакциналар уларга қарши тўлиқ ҳимоя бермаслиги қайд этилган.
Шу муносабат билан хўжаликларда ветеринария-санитария қоидаларига қатъий риоя этиш, кириш жойларида дезинфекция воситаларини ўрнатиш, бегона шахслар ва транспорт воситаларининг киришини чеклаш, ҳайвонларни сифатли озуқа ҳамда тоза сув билан таъминлаш, ҳудудларни мунтазам тозалаш ва зарарли жониворларга қарши курашиш зарурлиги таъкидланди.
Мутасаддилар ҳайвонларда юқори ҳарорат, оғиз бўшлиғи ва туёқларда яра, елин қисмида шикастланиш каби аломатлар кузатилса, дарҳол ветеринария мутахассисларига мурожаат қилиш лозимлигини эслатди. Бундай ҳолатларда ҳайвонларни бошқалардан ажратиш, мустақил равишда дори воситаларини қўлламаслик ҳамда маҳсулотларни ҳудуддан ташқарига чиқармаслик тавсия этилди.
Шунингдек, чорва ҳайвонларини ўз вақтида эмлаш касалликларнинг олдини олишда энг самарали чора экани қайд этилди. Қорамоллар йилига икки марта, қўйлар эса йилига бир марта эмланиши лозим.
Қишлоқ хўжалиги вазирлиги ҳамда Фермерлар кенгаши барча фермер ва чорвадорларни мазкур ойлик доирасида профилактик тадбирларни уюшқоқлик билан амалга оширишга чақирди.
Касаллик аломатлари аниқланганда мутахассисларга 71-202-12-00 (ички: 210, 218, 323) рақамлари орқали мурожаат қилиш мумкин.
