АҚШ ва Исроил ҳаво ҳужумлари оқибатида Эронда 138 минг фуқаролик объекти зарар кўрган
Улар орасида 113 мингдан ортиқ турар-жой бинолари мавжуд.
АҚШ ва Исроил томонидан амалга оширилган ҳаво ҳужумлари оқибатида Эронда жами 138 мингга яқин фуқаролик объектига зарар етган. Бу ҳақда ТАСС хабар берди.
Телеканал хабарида қайд этилишича, зарар кўрган объектлар орасида 113 мингдан ортиқ турар-жой бинолари, қарийб 23,5 минг тижорат бинолари, 300 дан зиёд тиббиёт муассасалари, 32 та университет ҳамда 993 та таълим муассасалари мавжуд.
Маълумотларга кўра, зарбалар натижасида мамлакатнинг турли ҳудудларидаги инфратузилма ва ижтимоий объектлар ҳам жиддий талафот кўрган.
Эслатиб ўтамиз, 28 февраль куни АҚШ ва Исроил томонидан Эронга қарши ҳарбий операция бошланган эди. Ҳужумлар давомида Теҳрон ва бошқа йирик шаҳарларга зарбалар берилгани хабар қилинган.
Бунга жавобан Эрон томони кенг кўламли қарши операция эълон қилган ҳамда минтақадаги айрим АҚШ ҳарбий объектларига зарбалар йўллаган.
7 апрель куни эса АҚШ президенти Доналд Трамп Эрон билан икки ҳафталик ўзаро сулҳ эълон қилган эди.
