Ўзбекистонда 2050 йилга бориб туғилишлар сони 1,2 миллиондан ошиши мумкин

 
“Оила ва гендер” илмий-тадқиқот институти томонидан “Ички ва ташқи миграциянинг демографик жараёнлар ва оила институтига узоқ муддатли таъсирини баҳолаш” илмий лойиҳаси доирасида туғилиш кўрсаткичларининг узоқ муддатли прогнози амалга оширилди.

 
Прогнозга кўра, Ўзбекистонда туғилишлар сони келгуси йилларда ўсишда давом этади. 2030 йилда 892,7 минг нафар, 2040 йилда 1 миллион 16,1 минг нафар, 2050 йилда эса 1 миллион 234,1 минг нафар туғилиш қайд этилиши кутилмоқда. Шу тариқа, 2050 йилга келиб туғилишлар сони 2025 йилга нисбатан 354,5 минг нафарга ёки 40,3 фоизга кўпайиши прогноз қилинган.

 
Ҳудудлар кесимида энг юқори ўсиш суръатлари Тошкент вилояти ва Тошкент шаҳрида кутилмоқда. Прогноз қилинаётган ўсиш кўрсаткичлари Тошкент вилоятида 62 фоиз, Тошкент шаҳрида 61 фоиз, Андижон вилоятида 48,6 фоиз, Самарқанд вилоятида 43,3 фоиз ва Наманган вилоятида 42,4 фоизни ташкил этади.

 
Туғилишнинг умумий коэффициенти бўйича эса ўрта муддатда бироз пасайиш, кейинчалик барқарор ўсиш тенденцияси кутилмоқда. Республика бўйича мазкур кўрсаткич 2030 йилда 21,2 промилле, 2040 йилда 20,8 промилле, 2050 йилда эса 21,9 промилле бўлиши прогноз қилинган.

 
2050 йилда туғилиш коэффициенти энг юқори бўлиши кутилаётган ҳудудлар қаторидан Сурхондарё – 24,7 промилле, Қашқадарё – 23,8 промилле, Наманган ва Самарқанд – 23,1 промилледан, Андижон – 22,9 промилле ҳамда Тошкент шаҳри – 22,3 промилле ўрин олган.

 
Институт маълумотларига кўра, туғилишлар сонининг прогноз қилинаётган ўсиши келгуси йилларда таълим, соғлиқни сақлаш, мактабгача таълим, уй-жой, ижтимоий хизматлар ва меҳнат бозори инфратузилмасига бўлган эҳтиёжни ҳам оширади.

 
Шунингдек, демографик ўзгаришларни олдиндан баҳолаш давлат ресурсларини самарали тақсимлаш, ҳудудларни комплекс ривожлантириш ҳамда инсон капиталига инвестицияларни стратегик режалаштириш имконини бериши қайд этилган.