Россия Эронга гипертовушли қанотли ракеталар ишлаб чиқишда яширинча ёрдам берган — FT
Теҳрон Россия кўмагида яратилган ракетани синовдан ўтказган, бироқ уни қуролли кучлар таркибига қабул қилгани номаълум.
Россия 2023 йилдан буён C430L код номи остидаги махфий дастур доирасида Эронга замонавий гипертовушли қанотли ракеталарни ишлаб чиқишда ёрдам бериб келган. Бу ҳақда Financial Times нашри сиздирилган ёзишмалар, сафарлар ҳақидаги маълумотлар ва ҳарбий патентлар таҳлилига асосланган суриштирувида маълум қилди.
FT маълумотларига кўра, дастур АҚШ ва Исроилнинг Эронга қарши уруши бошланганидан кейин ҳам давом этган.
C430L дастурининг асосий мақсади Эронга қанотли ракеталарда қўлланадиган тўғридан-тўғри оқимли двигателни ишлаб чиқишда ёрдам бериш бўлган. Бундай двигатель ракетага товуш тезлигидан бир неча баравар юқори тезликда парвоз қилиш имконини беради.
Дастур Россия томонидан «Рособоронекспорт» томонидан ташкил этилиб, лойиҳа «НПО машиностроения» билан ҳамкорликда мувофиқлаштирилган. Унда Россиянинг ракета ишлаб чиқариш соҳасидаги етакчи мутахассислари ҳам иштирок этган.
Экспертларнинг фикрича, ишлаб чиқилаётган технологиялар кемаларга қарши ҳамда қуруқликдаги нишонларга зарба берувчи ракеталарда қўлланиши мумкин.
FT маълумотларига кўра, Эрон тўғридан-тўғри оқимли двигателни аллақачон яратган ва унинг парвоз синовларини ўтказган. Бироқ Россия ёрдами билан ишлаб чиқилган гипертовушли қанотли ракетанинг қуролланишга қабул қилинганига ҳозирча далил йўқ.
FT 2024 йил июнида Россия президенти Владимир Путин Ғарб қуроллари билан Россия ҳудудига зарбалар берилишига жавобан Москва бундай зарбаларни амалга ошираётган давлатларнинг нозик объектларига қарши фойдаланиш учун дунёнинг бошқа ҳудудларига «худди шундай қуроллар» етказиб бериши мумкинлигини айтганини ҳам эслатган. Нашр қайд этишича, ўша вақтда C430L дастури аллақачон фаол бўлган.
