Дания илк бор Гренландияга муддатли ҳарбий хизматчиларни юборди
Даниянинг Арктикадаги ҳарбий иштирокини кучайтириш қарори АҚШнинг Гренландияга даъволари фонида амалга оширилмоқда.
Дания Арктикадаги ҳарбий мавжудлигини кучайтириш доирасида илк бор муддатли ҳарбий хизматчиларини Гренландияга юборди. Бу ҳақда Reuters хабар берди.
Мазкур қарор АҚШ президенти Доналд Трампнинг Данияга қарашли ярим автоном Гренландияни АҚШ тасарруфига ўтказиш ҳақидаги бир неча бор билдирган истаклари фонида қабул қилинган. Копенгаген ва Гренландия ҳукумати бу ғояни қатъиян рад этган.
Гренландияга юборилган ҳарбий хизматчилар Даниянинг ҳарбий хизмат муддатини узайтириш бўйича янги дастурининг илк гуруҳига киради. Улар Арктиканинг оғир иқлим шароитида жанговар ҳаракатлар олиб бориш ва омон қолиш бўйича тайёргарликдан ўтмоқда.
Ҳарбий хизматчилар «Аrctic Endurance» машғулотларида иштирок этмоқда. Ушбу машғулотлар НАТОнинг Арктикадаги мавжудлигини кучайтиришга қаратилган «Аrctic Sentry» миссияси доирасида ўтказилмоқда.
Дания ҳукумати Арктикадаги мудофаани кучайтириш учун миллиардлаб доллар маблағ ажратишни режалаштирган. Мамлакат мудофаа вазири минтақага йиллар давомида етарлича сармоя киритилмаганини тан олган.
Айни пайтда Россия НАТОнинг Арктикадаги фаоллиги кучайишидан хавотир билдирган ва буни бевосита хавфсизлик таҳдиди деб баҳолаган. Хитой ҳам минтақадаги, хусусан фойдали қазилмаларга бой ҳудудлардаги фаолиятини кенгайтирмоқда.
