Кореяда иш жойини ўзгартириш учун Миграция агентлиги розилиги талаб этилмайди

Миграция агентлиги E-9 визаси асосида Корея Республикасида вақтинча меҳнат фаолиятини амалга ошираётган фуқаролар билан тузиладиган уч томонлама шартноманинг айрим бандларини қайта кўриб чиқди.

Янги тартибга кўра, эндиликда фуқаролар иш жойини ўзгартиришдан олдин Миграция агентлигининг Кореядаги ваколатхонаси розилигини олиши шарт эмас. Шунингдек, мазкур талаб бажарилмаган тақдирда қўлланиладиган жарима санкциялари ҳам шартномадан чиқариб ташланди.

Агентликнинг маълум қилишича, аввалги талаблар ўзбекистонликларнинг Кореяда ноқонуний мақомга ўтиб кетишининг олдини олиш, улар билан доимий алоқани таъминлаш ҳамда зарур ҳолларда ижтимоий, ҳуқуқий ва моддий кўмак кўрсатиш мақсадида жорий этилган.

Бироқ амалиётда ушбу талаблар фуқароларнинг иш жойини ўзгартириш жараёнида маъмурий қийинчиликларга сабаб бўлаётгани аниқланган. Шу боис Кореядаги иш берувчилар, нодавлат нотижорат ташкилотлари ҳамда фуқаролардан келиб тушган мурожаатлар ўрганилиб, шартнома бандлари қайта кўриб чиқилган.

Шу билан бирга, янги тартиб Корея Республикасининг E-9 визаси бўйича белгиланган умумий қонунчилик талабларини бекор қилмайди.

Хусусан, фуқаро иш берувчи билан меҳнат шартномасини бекор қилганидан сўнг белгиланган муддатларга риоя қилиши лозим. Жумладан, шартнома бекор қилинган кундан бошлаб бир ой ичида расман иш изловчи сифатида давлат рўйхатидан ўтиши ва 90 кун ичида янги иш жойини топиб, тегишли тартибда расмийлаштириши керак.

Касаллик, ишлаб чиқаришдаги жароҳат, ҳомиладорлик ва туғруқ каби айрим ҳолатлар учун истиснолар назарда тутилган.

Белгиланган талаб ва муддатларга риоя қилинмаган тақдирда, Корея Республикасининг ваколатли органлари томонидан депортация чораси қўлланилиши мумкин. Бунда фуқарони қайтариш билан боғлиқ харажатлар фуқаро ёки унинг кафили зиммасига юкланади. Шунингдек, шартнома талабларини бажариш кечиктирилган ҳар бир ой учун 2 минг АҚШ доллари миқдорида жарима қўлланилиши белгиланган.

Корея Республикасининг «Хорижий ишчиларни ишга қабул қилиш тўғрисида»ги қонуннинг 25-моддасига кўра, E-9 тоифасидаги хорижий ходимлар қонунда назарда тутилган айрим ҳолатларда иш жойини ўзгартириш учун мурожаат қилиши мумкин.

Жумладан, меҳнат шартномасининг муддатидан олдин бекор қилиниши ёки узайтирилмаслиги, корхона фаолиятининг тўхтатилиши ёки тугатилиши, меҳнат шартлари бузилиши, адолатсиз муносабат ҳамда ходимнинг айбига боғлиқ бўлмаган бошқа ҳолатлар шулар жумласидандир.

Иш жойини ўзгартириш учун ариза Кореянинг ваколатли бандлик органига берилади.

Миграция агентлиги фуқаролардан янги енгилликлардан фойдаланиш билан бирга, Корея Республикаси қонунчилигида белгиланган тартиб ва муддатларга қатъий риоя қилишни сўради.