Чироқчида мактаб директори қўшимча дарс соатлари эвазига пора олгани учун 2 йилга қамалди
Ўқитувчи директорга 50 доллар бергач, ҳолат ҳақида ҳуқуқни муҳофаза қилувчи органларга хабар берган. Тезкор тадбирда директор қўлга олинган.
Қашқадарё вилояти Чироқчи туманида ўқитувчига қўшимча дарс соатлари ажратиш эвазига пул талаб қилган мактаб директори 2 йилга озодликдан маҳрум қилинди.
Суд ҳужжатларига кўра, фуқаро 2022 йил июнидан буён тумандаги мактаблардан бирида директор лавозимида ишлаб келган.
2026 йил май ойида мактаб ўқитувчиси 2026/2027-ўқув йилида дарс соатларини кўпайтиришни сўраб директорга мурожаат қилган. Директор дастлаб бунга рози бўлмаган, бироқ 1000 доллар берилса, қўшимча дарс соатлари ажратилишида ёрдам беришини билдирган. Ўқитувчи оилавий шароитини тушунтиргач, директор 700 долларга келишган.
Шундан сўнг ўқитувчи директорнинг уйига бориб, унга аванс сифатида 50 доллар берган ва ҳолат юзасидан Бош прокуратура департаментининг Чироқчи тумани бўлимига мурожаат қилган. Мурожаат асосида тезкор тадбир ўтказилиб, мактаб раҳбари ушланган.
Судда директор пулни дарс соатларини кўпайтириш эвазига эмас, балки қарз сифатида олганини билдирган ва енгиллик сўраган.
Суд ҳукмига кўра, фуқаро Жиноят кодексининг 210-моддаси 1-қисми — пора олишда айбдор деб топилган. Унга 2 йил муддатга озодликдан маҳрум қилиш жазоси тайинланган.
Шунингдек, у 2 йил давомида таълим муассасаларида раҳбарлик ҳамда моддий жавобгарлик билан боғлиқ лавозимларда ишлаш ҳуқуқидан маҳрум қилинган.
