Зеленский ва унинг оиласига умрбод давлат ҳимояси берилиши таклиф қилинди
Ҳужжатга кўра, ҳарбий ҳолат даврида фаолият юритган айрим юқори мартабали мансабдор шахсларга ҳам давлат ҳимояси берилиши мумкин.
Украина Президенти Вoлoдимир Зеленский ва унинг оила аъзоларига умрбод давлат ҳимоясини таъминлашни назарда тутувчи қонун лойиҳаси Олий Радага тақдим этилди. Бу ҳақда Украина парламентининг расмий веб-сайтида эълон қилинган ҳужжат маълумотларида қайд этилган.
Қонун лойиҳаси муаллифларидан бири Украина парламентининг Миллий хавфсизлик, мудофаа ва разведка қўмитаси котиби Роман Костенко ҳисобланади.
Ҳужжатга кўра, Президент билан бирга яшайдиган ёки унга ҳамроҳлик қиладиган оила аъзоларига, Президентнинг импичмент орқали лавозимидан четлатилиши бундан мустасно, унинг ваколатлари тугаганидан кейин ҳам умрбод давлат ҳимояси тақдим этилиши таклиф қилинмоқда.
Шунингдек, қонун лойиҳасида ҳарбий ҳолат даврида ўз вазифаларини бажарган Бош штаб ҳамда Миллий хавфсизлик ва мудофаа кенгаши аъзоларига давлат ҳимояси берилиши кўзда тутилган.
Мазкур таклиф муносабати билан Украина Давлат хавфсизлик бошқармаси ходимларининг умумий сонини 5 500 нафаргача ошириш ҳам назарда тутилмоқда.
Украинада ҳарбий ҳолат 2022 йил 24 февралда жорий этилган ва шундан буён бир неча бор узайтирилган. Зеленскийнинг президентлик муддати расман 2024 йил 20 майда якунланган. Украина расмийлари эса ҳарбий ҳолат давом этаётган пайтда мунтазам президентлик сайловларини ўтказиш мумкин эмаслигини билдирган.
