FIFA ва UEFA ўртасида Инфантино режаси сабабли можаро кучайди

FIFA АҚШ судига киритган ҳужжатида Европа футбол ташкилоти UEFA’ни ташкилот раҳбарияти ва президенти Жанни Инфантиноға қарши «туҳмат кампанияси» олиб бораётганликда айблаган. FIFA UEFA’нинг АҚШ судларидаги сўровларини тўхтатиш ёки кечиктиришни сўраган. Бу ҳақда AP News хабар берди.

Жанжал FIFA Forward Enterprise деб номланган лойиҳа атрофида юзага келган. Мазкур ташаббус орқали Жаҳон чемпионати ва FIFA’нинг бошқа мусобақаларидаги улушларни хусусий капитал инвесторларига сотиш эвазига 4,2 миллиард доллар жалб қилиш режалаштирилган эди. FIFA бу режадан 1 август куни, таклиф жамоатчиликка маълум бўлганидан бир неча кун ўтиб, кучли қаршиликлар ортидан воз кечган.

Шундан сўнг UEFA АҚШнинг Нью-Йорк, Флорида ва Колорадо штатларидаги судларига далилларни ошкор қилиш бўйича сўровлар киритган. Улардан бири Жаред Кушнернинг укаси Жош Кушнер ва унинг Thrive Capital Management инвестиция компаниясига тегишли ҳужжатларни олишни кўзда тутган.

FIFA Колорадодаги судга киритган аризасида UEFA’нинг ҳужжат талабларини «UEFA ва унинг раҳбариятига қарши туҳмат кампаниясини қўллаб-қувватловчи пресс-релизлардан бошқа нарса эмас» деб атаган. Ташкилот UEFA хорижий жиноий иш доирасида далилларни талаб қилаётганини, бироқ бундай жиноят иши ҳали мавжуд эмаслигини билдирган.

UEFA эса Инфантиноға нисбатан Швейцария судларида молиявий бошқарув билан боғлиқ эҳтимолий ҳуқуқбузарликлар юзасидан жиноий шикоят тайёрлаётганини маълум қилган. UEFA юристлари FIFA Forward Enterprise лойиҳаси Инфантино ва унинг яқин доирасига FIFA’нинг энг қиммат активларидан доимий улуш олиш ҳамда улардан фойда кўриш имконини бериши мумкинлигини даъво қилган.

FIFA, ўз навбатида, UEFA Европадаги футбол федерацияларига FIFA Forward Enterprise режасига қарши чиқиш учун босим ўтказганини ҳам айблаган. UEFA бу даъволарга муносабатини ушбу суд жараёни доирасида билдирган.