Тарихда илк бор 65 ёшдан ошганлар сони 5 ёшгача бўлган болалар сонидан ошиб кетди
Туғилиш даражасининг пасайиши ва умр кўриш давомийлигининг ошиши дунё демографик мувозанатини ўзгартирмоқда.
Тарихда илк бор дунё бўйича 65 ёш ва ундан катта ёшдаги аҳоли сони 5 ёшгача бўлган болалар сонидан ошиб кетди. Бу ҳақда Ахios АҚШ Аҳолини рўйхатга олиш бюроси ҳисоботига таяниб хабар берди.
Маълумотларга кўра, бундай демографик ўзгаришга дунё бўйлаб туғилиш даражасининг пасайиши ва ўртача умр кўриш давомийлигининг ортиши сабаб бўлмоқда.
Прогнозларга кўра, 65 ёш ва ундан катта ёшдаги аҳоли сони 2025 йилдаги 852 миллиондан 2060 йилга бориб қарийб 2 миллиардга етади. Шу даврда Ер юзининг умумий аҳолиси 10,23 миллиард кишига етиши кутилмоқда.
Ҳисоботда қайд этилишича, 2013 йилда дунё аҳолисининг 45 фоизи туғилиш даражаси авлодлар алмашинувини таъминлайдиган 2,1 кўрсаткичга тенг ёки ундан паст бўлган мамлакатларда яшаган. 2023 йилга келиб бу улуш 71 фоизга етган.
Демографик ўзгариш дунёнинг энг кўп аҳолига эга мамлакатларида ҳам кузатилмоқда. Хитой ва Ҳиндистонда туғилиш даражаси ҳозирда авлодлар алмашинувини таъминлаш учун зарур бўлган кўрсаткичдан паст. Бангладеш, Мексика ва Ветнам каби аҳолиси зич давлатларда ҳам туғилиш даражаси 2013 йилдан буён ушбу чегарадан пастлаган.
Мутахассислар фикрича, туғилиш даражасининг пасайиши ва аҳолининг қариши келгусида меҳнат бозори, ижтимоий ҳимоя ҳамда иқтисодий тизимларга сезиларли таъсир кўрсатиши мумкин.
