Бир фарзанд учун 752 млн сўм: отанинг даромадига қараб алимент ундирилди

Мажбурий ижро бюросининг Чилонзор туман бўлими иш юритувида бўлган ижро ҳужжатига кўра, фуқаро А.Ф.дан вояга етмаган фарзанди таъминоти учун унинг даромадларининг тўртдан бир қисми миқдорида алимент ундириш белгиланган.

Дастлаб алимент маблағлари белгиланган тартибда ундирилган. Бироқ кейинчалик қарздор томонидан суд ҳужжатида белгиланган мажбуриятлар лозим даражада бажарилмаётгани аниқланган.

Шундан сўнг давлат ижрочилари қарздорнинг даромад манбалари ва молиявий имкониятларини ўрганиш мақсадида тегишли идораларга, жумладан, солиқ органларига сўровлар юборган.

Олинган маълумотлар асосида амалга оширилган қайта ҳисоб-китоб натижасида А.Ф.нинг алимент бўйича қарздорлиги 752 044 654,49 сўмни ташкил этгани аниқланган. Маълум бўлишича, қарздор хусусий корхонадан катта миқдорда иш ҳақи олган.

Қарздорга алимент тўлаш унинг нафақат қонуний, балки ота-оналик мажбурияти экани тушунтирилиб, қарздорликни бартараф этиш юзасидан бир неча бор огоҳлантирилган. Шунга қарамай, у мажбуриятини ихтиёрий равишда бажармаган.

Шундан сўнг давлат ижрочилари томонидан қонунчиликда белгиланган тартибда тегишли чоралар кўрилиб, Маъмурий жавобгарлик тўғрисидаги кодекснинг 47-4-моддаси асосида зарур ҳужжатлар расмийлаштирилган.

Судда иш кўриб чиқилаётган вақтда А.Ф. вазиятнинг ҳуқуқий оқибатларини англаб, фарзанди таъминоти учун ҳисобланган 752 млн сўмдан ортиқ алимент қарздорлигини тўлиқ тўлаб берган.

Натижада вояга етмаган фарзанд таъминоти учун тўпланиб қолган қарздорлик тўлиқ бартараф этилган. Шу сабабли А. Ф.га нисбатан МЖтКнинг 47-4-моддаси асосида юритилган иш Кодекснинг 271-моддасига асосан тугатилган.