Бухорода 7 та дорихонада ноқонуний савдода бўлган 101 турдаги дори воситаси аниқланди

Бухоро вилоятидаги 7 та дорихонада мувофиқлик сертификатига эга бўлмаган 101 турдаги ҳамда яроқлилик муддати ўтган 5 турдаги дори воситаси савдода экани аниқланди. Дорилар “Арзон аптека бот” иловасидаги эълонлар асосида ўтказилган назорат тадбирлари давомида савдодан олинди.

 

Фармацевтика маҳсулотлари хавфсизлиги маркази маълумотига кўра, назорат тадбирлари “Беродуал”, “Актовегин” ва “Калимин 60 H” дори воситаларининг ноқонуний реализацияси бўйича иловага жойлаштирилган эълонлар асосида ўтказилган.

 

Ўрганишлар давомида давлат рўйхатидан ўтказилмаган ва Ўзбекистонда тиббиёт амалиётида қўллашга рухсат этилмаган мазкур дори воситалари савдоси билан боғлиқ ҳолатлар аниқланган.

 

Савдодан олинган дори воситалари лаборатория экспертизасидан ўтказилмоқда. Аниқланган ҳолатларга ҳуқуқий баҳо бериш юзасидан тегишли ишлар олиб борилмоқда.

 

Шунингдек, “Арзон аптека бот” иловасида дорихона сифатида кўрсатилган “Online 5” субъекти фаолияти ҳам ўрганилган. Бухоро шаҳри, Баҳовуддин Нақшбанд кўчаси, 309/1-уй манзилида дорихона эмас, балки “BTS” тезкор почта хизматининг Бухоро вилояти офиси фаолият юритаётгани аниқланган.

 

Марказ “Арзон аптека бот” каби платформаларда дори воситалари ва уларни сотувчи субъектлар ҳақидаги маълумотларнинг ҳаққонийлиги ҳамда дорихоналарнинг қонуний фаолият юритишига эътибор қаратиш зарурлигини таъкидлади.

 

Фармацевтика маҳсулотлари хавфсизлиги маркази сифатсиз, қалбакилаштирилган, давлат рўйхатидан ўтказилмаган ёки тиббиётда қўллашга рухсат этилмаган дори воситалари савдосининг олдини олиш бўйича назорат тадбирлари бошқа ҳудудларда ҳам давом эттирилишини маълум қилди.