Майами халқаро аэропортида Boeing юк самолёти ҳалокатга учради: 5 киши ҳалок бўлди

АҚШнинг Майами шаҳридаги халқаро аэропортда Amazon Air юк самолёти қўниш вақтида учиш-қўниш йўлагидан чиқиб кетиб, бир нечта транспорт воситасига урилди ва ёнғин юзага келди. Ҳодиса оқибатида камида 5 киши ҳалок бўлган. Бу ҳақда NBC Miami хабар берди.

Маълум қилинишича, Пуэрто-Рикодаги Luis Muñoz Marín халқаро аэропортидан парвоз қилган Boeing 767-300F юк самолёти Майами халқаро аэропортига қўниш вақтида бошқарувни йўқотиб, аэропорт яқинидаги автотураргоҳда турган автомобилларга урилган.

Ҳодиса оқибатида яна 5 киши жароҳатланган. Жароҳатланганларнинг уч нафари оғир аҳволда шифохонага олиб кетилган. Самолётнинг икки учувчиси ҳам қутқарувчилар томонидан олиб чиқилиб, шифохонага етказилган.

Воқеа жойига 60 дан ортиқ ёнғин-қутқарув гуруҳи ва қарийб 200 нафар фавқулодда хизматлар ходими жалб этилган. Қутқарув ишлари билан бир қаторда, ёқилғи сизиб чиқиши оқибатларини бартараф этиш чоралари ҳам кўрилган.

Ҳодисадан сўнг аэропортдаги барча учиш-қўниш йўлаклари вақтинча ёпилган. Кейинчалик улардан иккитаси қайта очилган бўлса-да, айрим рейсларда кечикишлар ва бекор қилишлар кузатилган.

АҚШ Миллий транспорт хавфсизлиги кенгаши ҳодиса сабабларини аниқлаш учун терговчилар гуруҳини Майамига юборган. Amazon, 21 Air ва Boeing компаниялари ҳалок бўлганлар яқинларига ҳамдардлик билдириб, терговга ҳамкорлик қилишларини маълум қилган.

Ҳозирда авиаҳалокатнинг аниқ сабаблари ўрганилмоқда.