Трамп Ҳурмуз бўғози ва Ойни АҚШга тегишли деб атади
АҚШ президенти Truth Social’да Ҳурмуз бўғози суратини “Қўшма Штатларнинг янги ҳудуди”, Ойни эса “бизники” деган постларни эълон қилди.
АҚШ президенти Дональд Трамп Ҳурмуз бўғози ва Ойнинг АҚШга тегишли эканини таъкидловчи постлар эълон қилди.
Трамп Truth Social ижтимоий тармоғидаги саҳифасида Ҳурмуз бўғози суратини «Қўшма Штатларнинг янги ҳудуди» деган ёзув билан жойлаштирди. Шу тариқа у бўғозни АҚШ ҳудуди сифатида кўрсатган.
Аввалроқ Трамп Ҳурмуз бўғозини ўз шарафига «Трамп бўғози» деб қайта номлаш имкониятини кўриб чиқаётганини билдирган эди. Шунингдек, у Эрон Ҳурмуз бўғози устидан назоратни йўқотгани ва ҳудуд ҳозир АҚШ назоратида эканини айтган.
АҚШ расмийлари бўғознинг катта қисми миналардан тозалангани ва сўнгги ҳафталарда унинг жанубий қисмидан танкерлар ўтиши кўпайганини таъкидлаган. Эрон ташқи ишлар вазири ўринбосари Казем Ғариб-Ободий эса АҚШнинг бу борадаги даъволарини «ташвиқот ёлғони» деб атаган.
Бундан ташқари, Трамп Truth Social’да Ой суратини «Ой бизники» деган ёзув ва Америка байроғи билан эълон қилган. Шу орқали у Ойни ҳам АҚШга тегишли сифатида кўрсатган.
Трампнинг ушбу постларини эълон қилишига сабаб ҳозирча маълум эмас.
