Трамп Путин ва Зеленский билан телефон орқали гаплашиши кутилмоқда

 

АҚШ президенти Доналд Трамп 7 сентябрь куни Россия президенти Владимир Путин ва Украина президенти Владимир Зеленский билан телефон орқали мулоқот қилиши кутилмоқда.

 

Censor.NET ва бошқа манбаларга кўра, Трамп аввал Путин, кейин эса Зеленский билан суҳбатлашади. Қўнғироқлардан олдин унинг махсус вакили Стивен Виткофф ва куёви Жаред Кушнер Москвада ҳамда Киевда ўтказилган учрашувлар натижалари ҳақида президентга маълумот бериши кутилмоқда.

 

Аввалроқ Виткофф ва Кушнер Москвада Владимир Путин билан учрашиб, уч соатдан ортиқ музокара олиб боргани, кейинчалик эса Киевга бориб, Владимир Зеленский билан учрашгани хабар қилинган эди.

 

Шунингдек, АҚШ маъмурияти Украина бўйича янги тинчлик пакети устида ишлаётгани айтилмоқда. ОАВларда ушбу режага ўт очишни тўлиқ тўхтатиш, ҳудудий масалалар, Украинада сайлов ва референдум ўтказиш, мамлакатнинг блокларга қўшилмаслик мақомини мустаҳкамлаш, Қуролли Кучлар сонини чеклаш ҳамда тинчлик шартномасини халқаро даражада мустаҳкамлаш каби эҳтимолий бандлар келтирилмоқда.

 

Бироқ мазкур бандларнинг Трампнинг янги тинчлик режасига расман киритилгани ҳозирча тасдиқланмаган.