Конго ДРда тўй маросимида ёнғин чиқиб, 22 киши ҳалок бўлди
Конго бош вазирининг ўринбосари ва ички ишлар вазири воқеа жойига ташриф буюрган.
Конго Демократик Республикаси пойтахти Киншасада тўй маросими вақтида юз берган ёнғин оқибатида камида 22 киши ҳалок бўлди. Яна бир неча киши жароҳатланган.
Ҳодиса жума куни кечқурун шаҳарнинг шимолидаги Лингвала ҳудудида жойлашган бинода содир бўлган. Ёнғин шанба куни тонггача давом этган.
Ёнғин пайтида одамлар бинодан чиқишга уринган. Бироқ тор йўлаклар одамлар билан тўлиб қолган ва бу уларнинг бинони тезда тарк этишига халақит берган. Воқеа жойида айрим тирик ва ҳалок бўлганлар йўл четига ётқизилган, маросим иштирокчилари эса жабрланганларга ёрдам кўрсатишга ҳаракат қилган.
Лингвала мери Норберт Мушинга қурбонлар сони дастлабки маълумотларга кўра 22 кишини ташкил этаётганини билдирган. Унинг сўзларига кўра, ҳалок бўлганлар сони яна ошиши мумкин.
Ёнғиннинг келиб чиқиш сабаби ҳозирча аниқланмаган. Конго бош вазирининг ўринбосари ва ички ишлар вазири Жаквумин Шабани шанба куни эрталаб воқеа жойига ташриф буюрган.
Киншасанинг аҳоли зич жойлашган ҳудудларида ёнғинлар тез-тез содир бўлади. Маҳаллий ОАВга кўра, шаҳарда қуруқ мавсумда бундай ҳодисалар кўпаяди. Шаҳарнинг айрим ҳудудларида ёнғин хавфсизлиги хизматлари каби зарур инфратузилма етарли даражада таъминланмаган.
