Яқин Шарқдаги кескинлик фонида Brent нефти нархи 100 долларга яқинлашди
Нефть нархининг ошишига АҚШ ва Эрон ўртасидаги қарама-қаршиликнинг кучайиши сабаб бўлмоқда.
Яқин Шарқдаги кескинликнинг кучайиши фонида Brent маркали нефть нархи кетма-кет тўртинчи савдода ҳам ошиб, бир баррель учун 100 долларга яқинлашди.
"Интерфакс" хабарига кўра, 9 сентябрь куни Лондоннинг ICE Futures биржасида Brent нефтининг ноябрь фьючерслари соат 08:20 ҳолатига 99,02 долларни ташкил қилган. Бу аввалги савдо сессияси якунига нисбатан 1,1 доллар ёки 1,12 фоизга кўп.
Бундан бир кун аввал, 8 сентябрда Brent фьючерслари 0,92 долларга ёки 0,9 фоизга қимматлаб, 97,92 доллар даражасида ёпилган.
Нефть нархининг ошишига АҚШ ва Эрон ўртасидаги қарама-қаршиликнинг кучайиши сабаб бўлмоқда. Эрон Ислом инқилоби қўриқчилари корпуси Иорданиядаги Муваффақ Салти авиабазасида жойлашган АҚШ ҳарбийларига, шунингдек, АҚШ ҳарбий-денгиз кучларининг икки эсминецига ракета зарбалари берилганини маълум қилган.
Аввалроқ АҚШ Марказий қўмондонлиги Форс ва Уммон қўлтиғида бешта Эрон нефть танкерини йўқ қилганини билдирган. АҚШ томони буни ўз ҳарбий-денгиз кучлари кемасига уюштирилган ҳужумга жавоб чораси сифатида изоҳлаган.
Шунингдек, 8 сентябрь куни Ямандаги ҳусийлар Саудия Арабистонининг жанубидаги қатор нефть қазиб олиш объектларига ҳужум қилган. Саудия Арабистони Энергетика вазирлиги маълумотига кўра, ҳужумлар оқибатида нефть объектларида ёнғинлар юзага келган ва уларнинг фаолияти вақтинча тўхтатилган.
Шу билан бирга, Нью-Йорк товар биржасида (NYMEX) октябрь ойида етказиб бериладиган WTI нефти нархи 0,97 долларга ёки 1,04 фоизга ошиб, 94 долларга етган. Аввалги савдода WTI 1,55 долларга ёки 1,7 фоизга қимматлаган ва 93,03 долларни ташкил қилган.
Brent нефти нархи август бошидан буён қарийб чорак қисмга ошган.
Таҳлилчиларга кўра, Вашингтон ва Теҳрон ўртасидаги музокараларнинг тез орада қайта тикланишига умидларнинг сусайиши ҳамда минтақадаги ҳарбий ҳаракатларнинг давом этиши бозорда геосиёсий хатарлар учун қўшимча нарх устамасини шакллантирмоқда.
