Биринчи қаватдаги хонадонлардан савдо ва сервис учун фойдаланишга рухсат берилиши мумкин

Кўп квартирали уйларнинг биринчи қаватидаги хонадонларни нотурар жой тоифасига ўтказмасдан, уларни савдо ва сервис фаолиятига мослаштиришга рухсат бериш таклиф қилинди. Бу ҳақда Президент Шавкат Мирзиёев раислигида ҳудудларда аҳоли бандлиги ва даромадларини ошириш масалалари бўйича ўтказилган кенгайтирилган йиғилишда маълум қилинди.

 

Қайд этилишича, биринчи қаватлардаги хонадонларда сартарошхона, гўзаллик салони, кичик дўкон, ателье, пойабзал ва маиший техника устахонаси каби хизмат кўрсатиш шохобчаларини ташкил этиш мумкин. Бироқ бунинг учун хонадонни нотурар жой тоифасига ўтказиш талаб этилгани тадбиркорликни бошлашда қўшимча тартиб-таомилларни юзага келтирмоқда.

 

Шу сабабли хонадон эгаси ёки тадбиркорнинг тегишли фаолиятни бошлагани ҳақида хабар бериши етарли бўлиши таклиф этилди.

 

Мутасаддиларга бир ой ичида биринчи қаватдаги хонадонларда йўл қўйиладиган хизмат турлари ва уларга қўйиладиган хавфсизлик талабларини белгилаш вазифаси топширилди.

 

Йиғилишда ҳудудларда фойдаланилмаётган имкониятларни ишга солиш орқали янги иш ўринлари яратиш масаласига ҳам эътибор қаратилди. Туман ва маҳаллаларда бўш ёки тўлиқ фойдаланилмаётган бино-иншоотлар, шунингдек, ишлаб чиқариш ва хизмат кўрсатиш лойиҳаларини жойлаштириш мумкин бўлган ерлар аниқланиб, янги лойиҳаларга бириктирилиши кераклиги таъкидланди.

 

Гавжум кўчаларда мастер-режалар асосида тадбиркорлик объектларини жойлаштириш, тарихий шаҳарлар ва туризм маҳаллаларида кўчаларни “эски шаҳар” услубида таъмирлаш ҳамда меҳмон уйлари, савдо ва сервис шохобчаларини кўпайтириш бўйича вазифалар белгиланди.

 

Қишлоқ хўжалигида эса эски боғлар ва қаровсиз ерларни янгилаш орқали ҳар бир гектардан олинадиган даромадни ошириш зарурлиги қайд этилди. Бундай чоралар ердан самаралироқ фойдаланиш ва қишлоқ аҳолиси учун қўшимча даромад манбаларини яратишга хизмат қилиши кўзда тутилмоқда.

 

Шунингдек, кўп қаватли уйлар атрофидаги бўш ҳудудларни аниқлаш ва ўзбошимчалик билан эгалланган жойларни тартибга келтириш топширилди. Бу ҳудудларда болалар майдончалари, спорт ва фитнесс зоналари, яшил майдонлар ташкил этиш ҳамда кўчаларни ёритиш вазифалари белгиланди.