Хитой ва Россия Шимолий Корея билан стратегик алоқаларни кучайтиришини билдирди

Хитой раиси Си Цзиньпин ва Россия президенти Владимир Путин Шимолий Корея ташкил топганининг 78 йиллиги муносабати билан мамлакат етакчиси Ким Чен Инга табрик мактублари йўллаб, Пхеньян билан стратегик алоқаларни мустаҳкамлашга тайёр эканини билдирган. Бу ҳақда Шимолий Корея давлат ахборот агентлигига таяниб, Reuters хабар қилди.

Си Цзиньпин мактубида Хитой Шимолий Корея билан муносабатларни стратегик жиҳатдан ривожлантиришни давом эттириш ва икки давлат тараққиётини илгари суриш учун Ким Чен Ин билан ҳамкорлик қилишга тайёрлигини билдирган.

Хитой раҳбари Пекин ва Пхеньян ўртасидаги алоқаларни мустаҳкамлаш ва ривожлантириш Хитой Коммунистик партияси ҳамда ҳукуматининг «изчил ва ўзгармас сиёсати» бўлиб қолишини таъкидлаган. Шунингдек, у июнь ойида Пхеньянга амалга оширган ташрифи икки давлат муносабатлари ривожида «янги саҳифа» очганини қайд этган.

Путин эса ўз мактубида Ким Чен Ин билан «энг яқин ҳамкорлик»ни давом эттириб, Россия ва Шимолий Корея ўртасидаги кенг қамровли стратегик шерикликни янада мустаҳкамлаш ниятида эканини билдирган.

Россия президенти Москва ва Пхеньян ўртасидаги алоқалар минтақавий хавфсизликни таъминлаш ҳамда «янада адолатли, кўп қутбли дунё тартиби»ни шакллантиришга хизмат қилишини таъкидлаган.

Си Цзиньпин ва Путиннинг мактублари Шимолий Корея ҳукмрон Ишчилар партиясининг «Родонг Синмун» газетасининг биринчи саҳифасида эълон қилинган.

Шимолий Корея 9 сентябрь куни 1948 йилда ташкил топганининг 78 йиллигини нишонлаган. Келтирилган маълумотларга кўра, Ким Чен Инга Вьетнам, Лаос, Камбоджа, Мўғулистон, Швеция, Беларусь, Сингапур, Швейцария ва Зимбабве каби давлатлар раҳбарлари ҳам табрик йўллаган.