Дипломатияга қабул тартиби қайта кўриб чиқилади
Олий таълим, фан ва инновациялар вазирининг маълум қилишича, бу йил дипломатия йўналишида 550 та ўрин учун 3 200 нафар абитуриент 189 балл тўплаган.
Вазир Қўнғиротбой Шарипов дипломатия йўналишига қабул жараёнида келгусида ўзгаришлар кутилаётганини маълум қилди.
Унинг айтишича, бу йил дипломатия йўналишида 550 та ўрин учун 3 200 нафар абитуриент 189 балл тўплаган. Юқори натижа қайд этган абитуриентлар сонининг кўплиги қабул жараёнини қайта кўриб чиқиш заруратини юзага келтирган.
«Ҳар бир йўналишнинг спецификаси ва ўзига хослигидан келиб чиқиб, қўшимча тест бўладими ёки имтиҳонларнинг мураккаблик даражаси қайта кўриб чиқиладими — буни ҳозир ўйлаяпмиз», — деди Қўнғиротбой Шарипов.
Вазирнинг таъкидлашича, сертификат билан юқори натижа кўрсатаётган абитуриентлар сони йилдан-йилга ортиб бормоқда.
Шу сабабли дипломатия йўналишига қабул тартибига келгуси йилдан ўзгартиш киритилиши кутилмоқда.
