1,4 млрд сўмлик давлат харидида қонунбузилишлар аниқланди
Коррупцияга қарши курашиш агентлиги учта тендерда рақобат ва холислик бузилганини маълум қилди.
Коррупцияга қарши курашиш агентлиги томонидан ўтказилган ўрганишлар давомида давлат харидларига оид учта ҳолатда жами 1,4 миллиард сўмлик қонунбузилишлар аниқлангани маълум қилинди. Агентлик маълумотига кўра, мазкур жараёнларда “Давлат харидлари тўғрисида”ги Қонун талаблари бузилган, рақобат ва холислик принциплари таъминланмаган.
Текширувлар шуни кўрсатдики, Республика ихтисослаштирилган гематология илмий-амалий марказининг 832 миллион сўмлик Мирасол плазма тўпламлари хариди, Хоразм вилояти ҳокимлиги “Ягона буюртмачи хизмати”нинг 298 миллион сўмлик экотуризм бўйича мастер-режа ишлаб чиқиш лойиҳаси, ҳамда Олий суд ҳузуридаги департаментнинг Жиззахдаги бўлими томонидан 253,5 миллион сўмлик музей жиҳозларини харид қилиш жараёнларида қонунбузилишлар кузатилган.
Агентлик тақдимномалари асосида харид комиссияларининг ғолибларни аниқлаш бўйича баённомалари бекор қилинди. Бу билан тендерларнинг қонунга хилоф тарзда ўтказилишининг олди олинди ва давлат маблағларидан ноўрин фойдаланиш хавфи бартараф этилди.
Йиғилган ҳужжатлар тегишли ҳуқуқни муҳофаза қилувчи органларга юборилган бўлиб, улар томонидан белгиланган тартибда қонуний чора кўрилиши режалаштирилган.
