18 май – Халқаро музейлар куни
"Ўзбекистон санъати: XX-XXI асрларда рангтасвир ва ҳайкалтарошлик" кўргазмаси бўлиб ўтди.
Халқаро музейлар куни муносабати билан ҳафта давомида республика бўйлаб тадбирлар — ижодий учрашувлар, маърузалар ва маҳорат дарслари ўтказилади. Куннинг энг муҳим тадбиридан бири Ўзбекистон давлат санъат музейида бирданига бир нечта янги экспозициялар очилгани бўлди.
"Таъкидлаш керакки, бугун Ўзбекистон давлат санъат музейида Ўзбекистон рангтасвири экспозицияси бутунлай янгиланибди. Буни экспозицияни кўриб яққол ҳис қилиш мумкин. Сабаби, Ўзбекистон тасвирий санъати, жумладан, рангтасвирининг пайдо бўлиши бир неча босқичда амалга оширилган. Мана бугунги кўргазманинг номи ҳам "Ўзбекистон санъати: XX-XXI асрларда рангтасвир ва ҳайкалтарошлик" деб номланган. Сабаби, бутун ХХ аср давомида ҳар ўн йилликда турли сиёсий, ижтимоий, бадиий ҳаётда ўзгаришлар бўлган. Шу ўзгаришлар таъсирида рассомлар ижод қилишган. Биз бугун жуда хурсандмиз. Чунки Ўзбекистон рангтасвири эволюциясини экспозиция тўлиқ қамраб ола олган", — дейди санъатшунослик фанлари фалсафа доктори Дилзода Алимқулова.
Ўзбекистон давлат санъат музейининг учинчи қаватида ХХ-ХХI асрларга оид Ўзбекистон рангтасвир ва ҳайкалтарошлик санъатининг янгиланган экспозицияси намойиш этилди. Унда Ўзбекистоннинг таниқли рассомлари — Лев Буре, Александр Волков, Михаил Курзин, Виктор Уфимсев, Урал Тансиқбоев, Баҳром Ҳамдамий ва Акрам Сиддиқийларнинг музей коллекцияларида сақланаётган асарлари кўп йиллар давомида биринчи марта томошабинлар эътиборига ҳавола қилинди.
