"Ўзбекистон–2030" стратегияси доирасида Оролбўйи минтақасининг экологик барқарорлигини таъминлаш устувор йўналиш бўлиб қолмоқда. 2025 йилда ушбу ҳудуддаги экологик вазиятни яхшилаш мақсадида халқаро ҳамкорлар иштирокида 32 миллион доллардан ортиқ грант маблағлари жалб этилди. Маблағлар табиий экотизимларни тиклаш, экологик хатарларни камайтириш ва аҳоли турмуш шароитини яхшилашга йўналтирилди.
Жорий йил давомида Оролбўйида жами 150 минг гектардан ортиқ майдонда яшил ҳудудлар барпо этилди. Асосий ишлар Орол денгизининг қуриган туби ва унга туташ ҳудудларда амалга оширилиб, Мўйноқ тумани, шунингдек, Бухоро, Навоий ва Хоразм вилоятларининг айрим туманларини қамраб олди.
Кўкаламзорлаштиришда шўр ва қурғоқчил шароитга чидамли ўсимлик турларига устуворлик берилди. Саксовул, черкас ва қорабуроқ каби чўл ўсимликлари экилиб, бунинг учун юзлаб тонна уруғ захиралари тайёрланди.
Шунингдек, 2025 йилда грант маблағлари ҳисобидан еттита халқаро экологик лойиҳа ишга туширилди. Улар сув ва ер ресурсларини барқарор бошқариш, биологик хилма-хилликни сақлаш ҳамда Орол инқирози оқибатларини юмшатишга қаратилган бўлиб, минтақанинг узоқ муддатли барқарор ривожланишига хизмат қилиши кутилмоқда.