2026 йилда Ўзбекистонда 110 километр янги темир йўл тармоғи қурилиши режалаштирилмоқда. Натижада Бўка, Пискент, Бекобод, Боёвут туманлари ҳамда Нурафшон шаҳри пойтахт Тошкент билан тўғридан тўғри темир йўл алоқасига эга бўлади. Бу ҳудудлар учун транспорт қатнови сезиларли даражада қулайлашади.
Шунингдек, Президент 2026 йилда Тошкент – Самарқанд йўналиши бўйича юқори тезликда ҳаракатланадиган йўловчи поездлар учун янги темир йўл линиясини қуриш ишлари бошланишини маълум қилди. Ушбу лойиҳа икки йирик шаҳар ўртасидаги қатнов вақтини қисқартириш ва йўловчилар оқимини оширишга хизмат қилади.
Бундан ташқари, Тошкент, Самарқанд, Бухоро, Хива ва Навоий шаҳарларидаги темир йўл вокзалларини хусусий шериклик асосида бошқарувга бериш режалаштирилгани ҳам қайд этилди. Бу ташаббус темир йўл инфратузилмасини модернизация қилиш ва хизматлар сифатини яхшилашга қаратилган.