Туркманистонда Ўзбекистон Президенти сайловига бағишланган брифинг ташкил этилди
Хабарингиз бор, 2021 йил 24 октябрь куни Ўзбекистон президенти сайлови бўлиб ўтади. Ўзбекистоннинг Туркманистондаги элчихонасида Ўзбекистон Президенти сайловига бағишланган брифинг бўлиб ўтди. Бу ҳақда "Дунё" АА хабар берди.
Тадбирда Ашхобод шаҳрида аккредитациядан ўтган дипломатик миссиялар раҳбарлари ва ходимлари, Туркманистон жамоатчилиги ва оммавий ахборот воситалари вакиллари иштирок этди. Унда 24 октябрь куни бўлиб ўтадиган Ўзбекистон Президенти сайловига тайёргарликнинг сўнгги босқичи ҳақида маълумот берилди.
Сайловларнинг демократик норма ва стандартларга мос ўтказилишини таъминлаш учун Европада хавфсизлик ва ҳамкорлик ташкилотининг демократик институтлар ва инсон ҳуқуқлари бўйича бюроси миссияси ҳамда 400 дан зиёд хорижий кузатувчи таклиф этилгани қайд этилди. Шунингдек, сайловларни ёритиш учун хорижий оммавий ахборот воситаларининг 200 дан ортиқ вакили аккредитациядан ўтгани таъкидланди.
Таъкидланишича, хорижда яшаётган ватандошлар учун қулай шарт-шароитлар яратиш мақсадида Ўзбекистоннинг дипломатия муассасалари ҳузурида 54 та сайлов участкаси ташкил этилди.
Маълумот учун: хориждаги сайловчилар электрон рўйхатини тузиш учун махсус сайт ишга тушган. Ўзбекистоннинг дипломатик ваколатхоналари фаолият кўрсатадиган 37 мамлакатда 54 та стационар сайлов участкалари ташкил этиш режалаштирилган.
Эслатиб ўтамиз, 14-20 октябрь кунлари президент сайловида муддатидан олдин овоз бериш ўтказилади. Муддатидан олдин овоз бериш учун сайловчи сабабини кўрсатган ҳолда тегишли сайлов участкасига ариза билан мурожаат қилади.
Аввалроқ Ислом ҳамкорлик ташкилоти кузатувчилар миссияси Ўзбекистонга келгани, Буюк Британия, Малайзия, Покистон ва Нидерландияда муддатидан олдин овоз бериш жараёни бошлангани ҳақида хабар берилганди.
