Афғонистон ҳукумати вақтинчалик муваффақиятсизликка учради — Эрдўған
Туркия Президенти “Катта йигирмалик” давлатларининг Афғонистон бўйича махсус саммитида муҳим таклифлар берди. Бу ҳақда “Спутник Афганистан” маълум қилди.
Эрдўған Афғонистон бўйича G20 доирасида махсус ишчи гуруҳ тузишни таклиф қилди. “Туркия бу гуруҳга бошчилик қилиши мумкин”, – деган у. Туркия етакчисининг фикрича, Афғонистонда тинчлик ва барқарорлик ўрнатиш бутун минтақа ва дунё учун катта аҳамиятга эга.
Афғонистонга гуманитар ёрдам бериш зарурати ҳақида гапирар экан, Эрдўған Туркия кўмак беришда давом этишини айтган. Шунингдек, у вақтинчалик ҳукумат ҳақида фикр билдирди:
“Афғонистоннинг вақтинчалик ҳукумати тўла муваффақиятсизликка учради. Биз ҳали экстремизмнинг олдини олишга қаратилган ҳаракатларни кўрмадик. Бу хотин-қизлар таълими, миллий озчилик ҳуқуқи масалалари”, — деган Туркия раҳбари.
Афғонистон масаласи бўйича “катта йигирмалик” давлатлари фавқулодда саммити Италия ташаббуси билан видеоконференция алоқа шаклида бўлиб ўтмоқда.
Аввалроқ Жозеф Байденнинг ҳаётини сақлаб қолган афғон таржимони эвакуация қилингани ҳамда АҚШ ва “Толибон” музокаралари ҳақида хабар қилинганди.
Жаҳонгир Қўзиев
